Kryeministri i Kosovës, aktualisht po qëndron në Austri. Atje, pos që shkoi për Forumin Ekonomik të Vjenës, u takua edhe me mërgatën.
Nëpërmjet një postimi në Facebook me video, ai thotë se mërgata jonë është e rëndësishme për të ardhmen e kombit dhe shtetit tonë siç ishte për të kaluarën e vendit dhe popullit tonë.
“Mërgata jonë është e rëndësishme për të ardhmen e kombit dhe shtetit tonë siç ishte për të kaluarën e vendit dhe popullit tonë. Andaj sa herë që jemi në vizita jashtë vendit takohemi me ta për t’i falënderuar për kontributin që nuk rresht, për t’i njoftuar me mundësitë që ofrojmë për ta dhe për t’i ftuar që të investojnë në vendin tonë”, ka shkruar Kurti, njofton Klankosova.tv.
Shefi i qeverisë më tej thotë se bashkë me ministren e Punëve të Jashtme, Donika Gërvallën, u kanë bërë thirrje bashkatdhetarëve në Vjenë, për pjesëmarrjen e tyre në procesin e regjistrimit online të diasporës në kuadër të regjistrimit të popullsisë dhe regjistrimin për votim nga jashtë në zgjedhjet që po afrojnë.
“Në mesin e qindra bashkatdhetarëve në Vjenë, nga qindra mijëra që jetojnë e punojnë në Austri, me zëvendëskryeministren Gërvalla ndër të tjera bëmë thirrje për pjesëmarrjen e tyre në procesin e regjistrimit online të diasporës në kuadër të regjistrimit të popullsisë dhe regjistrimin për votim nga jashtë në zgjedhjet që po afrojnë. Për të parën ka afat deri me 31 dhjetor dhe është jetike në planifikimin dhe organizimin e shërbimeve që institucionet tona ofrojnë për mërgatën. Për të dytën afati është deri më 26 dhjetor, dhe mundëson realizimin e një të drejte kushtetuese që për herë të parë do të mund të ushtrohet përmes votimit fizik apo me postë në ambasadat dhe konsullata e Republikës sonë”, ka shkruar tutje Kurti, njofton Klankosova.tv.
