Kryeministri Albin Kurti, ka thënë se ministri për Komunitete dhe Kthim, Nenad Rashiq, është sulmuar pasi iu ka ndihmuar serbëve të Kosovës.
Në konferencën e përbashkët me Rashiqin, Kurti tutje tha se kur Serbia e pa që serbët janë të kënaqur me të, u frikësuan nga ai.
“Rashiqi, është shembull i qeverisë në Kosovë. Sulmet që i ka përjetuar ai është pse iu ka ndihmuar shumë serbëve të Kosovës, prandaj është sulmuar. Po të mos iu ndihmonte, atëherë mos puna e tij do ta sulmonte, por kur e kanë parë që serbët janë kënaqur me kontributin që ky jep, e kanë sulmuar më shumë, i janë frikësuar andaj janë përpjekur ta frikësojnë, mirëpo kanë dështuar”, tha Kurti në konferencë, njofton Klankosova.tv.
Gjatë kësaj konference, Kurti tha se Serbia ka tentuar të futet drejtpërdrejt në zgjedhjet parlamentare të 9 shkurtit në Kosovë. Ai poashtu shtoi se Rashiqi në vazhdimësi është kërcënuar nga krimineli, Milan Radojçiq dhe persona të tij të afërt duke tentuar ta shantazhojnë për ta detyruar të tërhiqet nga gara.
“Ai dhe Ministria që drejton, gjithashtu kanë që qenë cak i sulmeve kibernetike me ç’rast profili i Rashiqit dhe Ministrisë në rrjete sociale janë hakuar”, tha tutje kryeministri.
