Kryeministri në detyrë, Albin Kurti, ka vizituar termocentralet Kosova A dhe Kosova B, ku nga afër është informuar për gjendjen aktuale të gjenerimit të energjisë elektrike dhe funksionimin e njësive prodhuese, teksa ka deklaruar se kemi stabilitet të funksionimit dhe energji të qëndrueshme.
“E pamë vetë se janë duke funksionuar tri njësi të termocentralit të Kosovës A, pra A3, A4 dhe A5 dhe dy njësi të termocentralit Kosova B, B1 dhe B2. Tek termocentrali Kosova A, përderisa A3 dhe A4 funksionojnë me kapacitet rreth 125 megavat secila prej tyre, A5 është rreth 140 megavat, pra gjithsej termocentrali Kosova A gjeneron bruto kapacitet të gjithmbarshëm rreth 390 megavat. Ndërsa kur shkuam në termocentralin Kosova B, pamë që ky termocentral me njësinë e vet B1 gjeneron kapacitet prej 259 megavat përafërsisht, ndërkaq ai B2 gjeneron 282 megavat. Të gjitha turbinat punojnë me 3 mijë rrotullime në minutë, për të siguruar frekuencën 50 hercë të rrymës alternative dhe kjo do të thotë që kemi stabilitet të funksionimit dhe energji të qëndrueshme”, ka theksuar Kurti në konferencë për media.
Kurti falënderoi bordin, menaxhmentin dhe të gjithë punëtorët e KEK-ut për punën e jashtëzakonshme që bëjnë, për të cilën tha është në shërbim të qytetarëve, por njëkohësisht edhe të bizneseve, të industrisë e të prodhimtarisë, por edhe të sigurisë së përgjithshme të Republikës.
Ai po ashtu përgëzoi edhe për investimet e bëra deri më tani dhe u zotua se në vijim do të kemi modernizim të termocentralit të Kosova B, por edhe rehabilitim të termocentralit Kosova A, e me ç’rast, siç tha, do të kemi edhe kapacitete të shtuara sa i përket gjenerimit të energjisë.
Duke folur për rëndësinë e termocentraleve për ngrohjen qendrore, Kurti theksoi se aktualisht ndërmarrja “Termokos” furnizohet me rreth 110 megavat nga Termocentrali Kosova B, duke përcjell edhe një lloj porosie siç tha nga punëtorët e KEK-ut, që në këtë natë të ndërrimit të motmoteve, më shumë nikoqirë të tregohen ata që e kanë ngrohjen nga Termokosi.
“Po ashtu u zotuam se do t’i bëjmë investimet me kohë në vitet 2026 dhe 2027, me ç’rast ka edhe afate të përcaktuara, ku bordi dhe drejtori e kanë të qartë se gjërat investohen dhe përmbyllen para afateve është në rregull, mirëpo jo edhe pas tyre. I falënderoj për bashkëpunimin e deritanishëm dhe zotohemi për mbështetjen e mëtejme për gjigantin tonë energjetik dhe ekonomik”, ka shtuar Kurti.
Ndërkohë, ministrja në detyrë e Ekonomisë, Artane Rizvanolli, tha se KEK-u gjatë këtij viti ka realizuar investimin më të madh në 40 vitet e fundit në sektorin e energjisë, duke modernizuar turbinën në bllokun B2 dhe duke bërë edhe investime tjera në këtë bllok, gjë e cila, sipas saj, ka rritur kapacitetin e kësaj njësie për 35 megavat.
“Jemi në një fazë kur ato kontrata të negociuara më herët po fillojnë të japin rezultatet e tyre dhe në vitin e ardhshëm pritet që i njëjti investim të bëhet edhe në njësinë B1, së bashku me vendosjen e filterëve që do ta ulin ndotjen ndjeshëm për qytetarët, veçanërisht për ata të Prishtinës, Fushë Kosovës dhe Obiliqit”, ka thënë Rizvanolli.
Kryeshefi Ekzekutiv i Korporatës Energjetike të Kosovës, Gramos Hashani, falënderoi kryeministrin në detyrë Kurti dhe minstren në detyrë Rizvanolli për vizitën dhe mbështetjen e projekteve.
“Në vitin 2025 deri në vitin 2027 kemi projekte mbi 500 milionë euro që do të investohen në KEK. Disa prej tyre kanë përfunduar, në B2 është përfunduar modernizimi i saj, vitin e ardhshëm do të fillojë instalimi i elektroflitrave dhe modernizimi i turbinës së saj. Gjithashtu kemi modernizimin e A3”, tha ai, teksa përmendi edhe Parkun Solar si një mundësi të mirë për rritjen e gjenerimit të megavatëve në vitet e ardhshme. Ai tha se vetëm nga modernizimi i njësive të dy termocentraleve do të përfitohen 130 megavat orë shtesë, derisa në vitin 2028 sipas tij KEK-u do të fillojë të gjenerojë megavatët e saj të parë pa djegie të thëngjillit, ku të prodhohen mbi 230 megavat orë shtesë të energjisë elektrike.
Ndërkaq kresuesi i Bordit të KEK-ut, Valdrin Krasniqi falënderoi të gjithë punëtorët e kësaj ndërmarrje për punën e vazhdueshme dhe për stabilitet të energjisë elektrike në vendin tonë, si dhe qeverinë për përkrahjen në investime.
