Pasi i fitoi zgjedhjet presidenciale në ShBA, ai ka të ngjarë të çmojë një gjë mbi të gjitha nga “kabineti i tij i kuzhinës” i këshilltarëve: besnikërinë.
Në një pranim të rrallë faji, Donald Trump i tha Joe Roganit, drejtuesi i podcast-it, muajin e kaluar se “gabimi më i madh” i mandatit të tij të parë ishte punësimi i “njerëzve të këqij, ose njerëzve jo besnikë” në ekipin e tij të Shtëpisë së Bardhë.
Pavarësisht emërimit të oficerëve të shquar ushtarakë si gjenerali në pension John Kelly, figurave të biznesit si ish-shefi i “ExxonMobil” Rex Tillerson dhe veteranë të administratave të mëparshme republikane si këshilltari i tij për sigurinë kombëtare, John Bolton, administrata e parë e Trumpit u shënua nga grindje publike, betejat kaotike politike dhe lëvizjet e mëdha të personelit, shkruan “The Times” në një analizë të fundit, transmeton kk.
Por kësaj radhe, Trumpi pritet t’i japë përparësi mbi të gjitha një cilësie teksa kërkon formimin e ekipit të tij të ri: besnikërinë.
Ndërsa kabineti i tij zyrtar do të duhet të konfirmohet nga Kongresi, Trumpi ka sinjalizuar se ai do të mbledhë një kabinet kuzhine me këshilltarë joformalë për të ndihmuar në realizimin e agjendës së tij ambicioze të mandatit të dytë. Por shumë persona që ishin të dobishëm në zgjedhjen e tij kanë gjithashtu prioritetet e tyre për një mandat të dytë të Trumpit.
Elon Musk
Ndoshta vëmendja më e madhe do të përqendrohet tek Elon Musk. Njeriu më i pasur në botë shpenzoi dhjetëra miliona dollarë për të ndihmuar Trumpin të zgjidhej dhe në këmbim pritet t’i jepet një rol i gjerë mbi buxhetin federal.
Musk, i cili ka kontrata qeveritare me vlerë miliarda dollarë me SpaceX dhe Tesla, ka premtuar të bëjë 2 trilionë dollarë shkurtime, kryesisht në burokracinë federale. Miliarderi i teknologjisë ka pranuar se masat e tij shtrënguese ndoshta do të shkaktojnë “vështirësi të përkohshme” për amerikanët e zakonshëm, por tha se vendi duhet “të fillojë nga e para” për të arritur “prosperitet afatgjatë”.
Musk, 53 vjeç, pritet gjithashtu të shtyjë Trumpin për një derregullim më të madh në fushat në të cilat ai ka investuar shumë, si AI dhe kriptomonedha. Kritikët pretendojnë se dhënia e mbikëqyrjes së shpenzimeve federale për Muskun krijon një konflikt interesi, ndërsa raportet për kontaktet e tij të fshehta me liderët e Rusisë dhe Kinës kanë shqetësuar ekspertët e sigurisë kombëtare.
Robert F Kennedy Jr
Pasardhësi i dinastisë më të famshme politike të Amerikës i dha një shtysë fushatës republikane kur ai i dha fund garës së tij të pavarur për Shtëpinë e Bardhë dhe mbështeti Trumpin në gusht.
Trump ka thënë tashmë se shpërblimi i tij për Robert F Kennedy Jr, një antivakser që ka promovuar pretendime të mohuara se vaksinat e fëmijërisë shkaktojnë autizëm, do të ketë një “rol të madh në administratë”. Trump ka thënë se ka në plan të lërë Kennedyn “të çmendet për shëndetin”, furnizimin me ushqim dhe të drejtat riprodhuese.
Kennedy pretendon se Trumpi i ka premtuar atij “kontroll” të agjencive të shëndetit publik të Amerikës dhe ka paraqitur plane për të hequr fluorin nga uji i pijshëm i vendit në ditët e para të administratës.
Njoftimi mund të tregojë mënyrën se si Kennedy dhe të tjerët kërkojnë të ndikojnë te Trumpi. I pyetur në lidhje me pretendimin e Kennedyt para zgjedhjeve, Trumpi tha se ata nuk kishin diskutuar për fluorin, por se ndalimi i propozuar “më tingëllon në rregull”, transmeton Klankosova.tv.
I pyetur nëse ndalimet e vaksinave mund të pasojnë gjithashtu, Trumpi tha vetëm se Kennedy ishte “një djalë shumë i talentuar dhe ka pikëpamje të forta”.
Donald Trump Jr
Donald Trump Jr, djali i madh i Trumpit, është më aktivi në politikë nga fëmijët e tij dhe mendohet se ka ambicie që shtrihen shumë përtej mandatit të dytë të babait të tij.
I tallur gjerësisht gjatë presidencës së parë të Trumpit, “Don Jr” është shfaqur si një aktivist i zgjuar dhe këshilltar i besuar me ndikim të pakrahasueshëm brenda lëvizjes Maga. 46-vjeçari ishte vendimtar në vendimin e babait të tij për të zgjedhur JD Vance si kandidat të tij dhe në propozimet ndaj Kennedyt që e bindi ish-demokratin të braktiste dhe të mbështeste Trumpin.
Me zgjedhjet e kryera, ai do të jetë i lirë të vazhdojë të formësojë lëvizjen Maga për brezin e ardhshëm. Detyra e tij e parë, megjithatë, është tërheqja e fuqisë punëtore federale për të siguruar besnikëri ndaj babait të tij.
Richard Grenell
Nëse besnikëria personale është konsiderata kryesore për Trumpin, atëherë kandidati më i mundshëm për sekretarin e tij të ardhshëm të shtetit mund të jetë Richard Grenell, i cili ishte ambasadori i tij në Gjermani dhe më pas i dërguari special për “negociatat e paqes” mes Kosovës dhe Serbisë. Këtë vit Don Jr e quajti Grenellin “pretendentin kryesor” për detyrën. Trumpi e ka quajtur atë “emisari im”, transmeton Klankosova.tv.
Marco Rubio, senator nga Florida dhe Doug Burgum, guvernatori i Dakotës së Veriut, ishin në listën e ngushtë për t’u bërë kandidatë të Trumpit dhe tani thuhet se janë gjithashtu në garë.
Ata përballen me konkurrencën nga Mike Pompeo, i cili mbajti rolin për pjesën më të madhe të mandatit të parë të Trumpit; Robert O’Brien, këshilltari i katërt i Trumpit për sigurinë kombëtare; Bill Hagerty, një senator nga Tenesi (dhe partner i golfit i Trumpit); dhe Tom Cotton, një senator nga Arkansas, i cili, si një ish-oficer i ushtrisë, besohet gjithashtu të jetë në listën e ngushtë për sekretarin e mbrojtjes.
Si njerëz tjerë të besueshëm të Trumpit konsiderohen edhe Stephen Miller, Kevin Roberts dhe Fondacioni Heritage, Brooke Rollins, Miriam Adelson e Chris LaCivita dhe Susie Wiles.
