Kuvendi i Kosovës ka hyrë në javën e pestë të krizës politike, pa arritur ende të konstituohet plotësisht. Përpjekjet për zgjedhjen e kryesisë kanë dështuar disa herë. Seanca konstituive pritet të vazhdojë nesër në orën 10:00. Megjithatë, ajo që nuk do t`u mungojë deputetëve që tashmë kanë dhënë betimin është paga.
Me gjithë bllokadën në Kuvend, deputetët e sapozgjedhur do të marrin paga të plota për periudhën që nga dita e betimit.
“Këtë muaj paga kanë realizuar deputetët e legjislaturës së tetë, të cilët kanë fituar mandatin edhe në legjislaturën e nëntë. Paga e deputetëve llogaritet nga dita e betimit, sipas koeficientit të paraparë në Ligjin e Pagave. Deputetëve të rinj do t’u procedohet paga për këtë periudhë në mënyrë retroaktive, me pagën e muajit maj”, kanë thënë nga Kuvendi i Kosovës.
Përjashtim nga kjo skemë do të jenë mëditjet, pasi Kuvendi ka bërë të qartë se deputetët nuk do të marrin kompensim shtesë për pjesëmarrje në seancat konstituive.
“Deputetët nuk marrin mëditje për pjesëmarrje në seanca”, thanë nga ky institucion.
Nga organizata që monitoron punën në Kuvendin e Kosovës, Instituti Demokratik i Kosovës, ndonëse e shohin pozitiv lajmin për heqjen e mëditjeve shtesë, për ta është e papranueshme pagesa për siç thonë, “një orë punë”.
“Unë besoj që paga e deputetit, ndonëse i njëjti e merr mandatin që nga certifikimi dhe nga dhënia e betimit tutje, nuk do të duhej të ishte valide për sa kohë që nuk konstituohet kuvendi sepse është kuvendi instanca për të cilin deputetët marrin pagat e tyre. Pra, vetëm nëse ekziston kuvendi si i tillë deputetët mund të marrin paga. Rrjedhimisht besoj se do të duhej precizuar që vetëm pas konstituimit të kuvendit fillojnë të rrjedhin obligimet respektivisht përfitimet ligjore për deputetët në raport me pagat e tyre”, tha për RTK-në, Eugen Cakolli hulumtues i lartë në KDI.
Cakolli thotë se në situatën aktuale në të cilën gjendet Kuvendi i Kosovës, për mëditje nuk duhet të flitet fare.
“Sepse po flasim për një situatë ku tashmë qytetarët besoj janë në gjendje kur jo vetëm se janë të lodhur e të ngopur nga një situatë e tillë por që në anën tjetër çfarë po ndodhë në kuvend është një tallje jo vetëm me vetë institucionin e kuvendit por edhe me qytetarët në përgjithësi”, tha Cakolli.
Sipas tij, skena aktuale në Kuvend është shembull i papërgjegjësisë institucionale që vazhdon të rëndojë mbi taksapaguesit./rtk
