Është lansuar platforma digjitale “Trashëgimi me ngjyra”, një libër interaktiv me aktivitete për fëmijë. Kjo platformë ofron një mënyrë emocionuese për të mësuar trashëgiminë kulturore përmes një sërë aktivitetesh, të gjitha të qasshme përmes cilësdo pajisje, qoftë IOS apo Android.
“Kjo nuk është vetëm një platformë thjesht zbavitëse, por është edhe një mënyrë kreative për t’u ndihmuar fëmijëve të mësojnë dhe të lidhen me thesaret kulturore dhe historike të komunës së Prishtinës. Gjatë gjithë rrugës, fëmijët mund të kënaqen duke ngjyrosur e duke luajtur, e duke i dhënë krahë kreativitetit të tyre”, njofton MKRS.
Tutje theksohet se duke ua bërë të njohur trashëgiminë kulturore në fazë të hershme, platforma gjithashtu do t’i nxisë fëmijët që ta vlerësojnë dhe ruajnë historinë tonë për brezat e ardhshëm.
Autore dhe ilustratore është Erodita Klaiqi, derisa zhvillues të platformës janë: Ylli Limani, Blina Kasumi, Gazmend Zeka dhe Alban Kasumi. Ky projekt është mbështetur nga Ministria e Kulturës, Rinisë dhe Sportit.
