Joan Laporta, president i Barcelonës, hapi ceremoninë e 125-vjetorit të klubit katalanas në galanë e organizuar në Gran Teatre del Liceu. Kreu i klubit mbajti një fjalim për këtë rast, duke u përpjekur të përmbante emocionet përballë të ftuarve dhe duke u ndalur tek disa pika të rëndësishme për të tashmen dhe të ardhmen e klubit.
“Barça bën ëndrrat realitet. Sot, qëllimi ynë kolektiv është ndërtimi i një stadiumi me kapacitet për më shumë se 100.000 persona. Kur të përfundojë, do të jetë stadiumi më i mirë në pesë kontinentet, ashtu siç kanë qenë gjithmonë stadiumet e Barçës. Ky është një klub i veçantë, i mrekullueshëm, plot pasion… më shumë se një klub”, tha Laporta.
Duke përshkuar historinë e jetës së Barçës, ai përmendi epokën e ‘Dream Team’ të drejtuar nga Johan Cruyff, kampionët si Ronaldo, Ronaldinho, Deco, gjashtë trofetë dhe “lojtarin më të mirë në historinë e klubit, Messi”.
Ai foli edhe për trajnerët që kanë drejtuar ekipin, me një dedikim të veçantë për Xavi Hernandezin, tashmë i zëvendësuar nga Flick: “Xavi na dha shpresë. Një shpresë që po bëhet realitet.”
Së fundi, Laporta kujtoi anëtarët dhe tifozët e klubit:
“Barça është një klub progresist. Gjithmonë kemi treguar respekt dhe mirënjohje për qytetin që na pa të lindnim, Barcelonën, dhe për vendin që na mirëpriti, Katalunjën. Gamper afroi Barçën me popullin e saj dhe e bëri klubin e Katalunjës, dhe kjo mbetet ende e vlefshme. Barça është e pranuar nga të gjithë tifozët, pavarësisht se ku kanë lindur, ashtu siç klubi pranon mendimin e miliona e miliona njerëzve. Kjo është fryma barceloniste. Ka shumë tifozë që vuajnë dhe gëzojnë për klubin në çdo pjesë të Spanjës. Luajmë më mirë kur jemi të gjithë bashkë”, përfundoi Laporta.s.n.
