Ish-legjenda e futbollit brazilian dhe ikonë e Milanit, Cafù, ka dhënë një intervistë për gazetën ‘Marca’, ku ka folur për disa çështje të rëndësishme që lidhen me futbollin brazilian dhe atë europian. Një nga temat kryesore ishte mungesa e trajnerit te Seleção, kombëtarja braziliane, dhe për këtë Cafù nuk heziton të përmendë një emër të madh si Carlo Ancelotti.
“Kam pasur mundësinë të punoj me Ancelottin për pesë vite te Milani, ndaj e di shumë mirë çfarë është në gjendje të bëjë. Do të ishte fantastike ta shihje atë në stolin e Brazilit, nëse CBF (Federata Braziliane e Futbollit) do të vendoste për të. Çdo lojtar i madh do ta dëshironte një trajner si ai në ekipin kombëtar. Uroj që drejtuesit tanë të vendosin sa më shpejt për të ardhmen e pankinës sonë,” u shpreh ai me bindje.
Cafù gjithashtu foli edhe për Topin e Artë, ku vuri në pah performancat e një bashkëkombësi që, sipas tij, e meriton çmimin më të lartë individual të futbollit. “Raphinha e meriton Topin e Artë prej kohësh. Këtë vit, akoma më shumë, për të gjitha statistikat dhe atë që ka bërë në kampionat dhe në Champions League,” deklaroi ai.
Në fund, ai komentoi edhe situatën aktuale te Real Madridi, duke dhënë një vlerësim pozitiv për klubin mbretëror, por gjithashtu ndaloi edhe te çështja e racizmit, veçanërisht ndaj yllit Vinicius Jr. “Real Madridi mbetet gjithmonë një ekip i frikshëm, me autoritet në fushë. Edhe pse është eliminuar nga Champions League, do të rikthehet fuqishëm sezonin tjetër, s’ka dyshim. Sa i përket racizmit ndaj Vinicius-it, është një çështje që lidhet me edukatën. Duhet të edukojmë njerëzit për të jetuar në një shoqëri ku mbizotëron barazia. Kjo është ajo që Vinicius përpiqet të përcjellë nëpërmjet futbollit të tij në fushë.”
Fjalët e Cafù vijnë si një thirrje për reflektim, jo vetëm për drejtuesit e futbollit brazilian, por edhe për botën e sportit në përgjithësi, në një kohë kur vlerat njerëzore dhe profesionalizmi duhet të ecin krah për krah.
