Gjykata Themelore Penale liroi sot nga aktakuza ish-ministren e Brendshme të Maqedonisë së Veriut, Gordana Jankulovska, për lëndën “Fortesa”.
Bëhet fjalë për pjesë të procesit të madh gjyqësor “Target-Fortesa” për përgjimin e jashtëligjshëm masiv, ku shumë nga veprat penale u vjetërsuan, pas ndryshimeve në Kodin Penal vitin e kaluar, shkruan tvklan.mk, transmeton kk.
Nga kjo lëndë mbeti vetëm pjesa me shkatërimin e pajisjeve për përgjim dhe falsifikimi i dokumenteve lidhur me shkatërrimin. Gjykatësi, Ilija Trpkov, gjatë shqiptimit të aktvendimit tha se Prokuroria nuk ka dëshmuar, jashtë dyshimeve të arsyeshme, se Jankulovska e ka bërë veprën për të cilën akuzohet.
Dënime me burg morën ish-agjentët e DSK-së, Goran Grujevski dhe Nikola Boshkovski, të cilët më 2017 u arratisën në Greqi dhe atje fituan azilin. Grujevski u dënua me 14.5 vjet burg, kurse Boshkovski me 9 vite e 10 muaj. Toni Jakimovski – shefi i kabinetit të ish-Drejtorit të DSK-së, Saasho Mijalkov, u dënua me 3 vjet burg.
Procesi gjyqësor për lëndën “Target – Fortesa” nisi më 2017, kurse aktvendimi i parë i shkallës së parë ishte në vitin 2017, por në 2018 Gjykata e Apelit Shkup ktheu lëndën në rigjykim.
Mijalkovi fillimisht ishte dënuar me 12 vjet burg, por ndërkohë vepra iu vjetërua.
