Sulmuesi polak Robert Lewandowski vijon të jetë protagonist në fushë në një sezon të çmendur për të.
Ai realizoi dy gola në fitoren 4-1 që Barcelona arriti ndaj Girona, duke shkuar sërish në +3 pikë ndaj Real Madrid në renditje.
Këto e çuan në 40 numrin e golave të realizuara nga sulmuesi i skuadrës katalanase.
“Kishim gjithçka nën kontroll, por në pjesën e parë duhej të bënim më mirë në pasimin e fundit”, tha Lewandowski.
“Në pjesën e dytë ishim më sulmues dhe krijuam më shumë raste. Shënuam disa gola dhe kjo është e rëndësishme sepse nëse nuk arrijmë të shënojmë në fillim, duhet të jemi të durueshëm dhe t’i përmbahemi planit”, shtoi polaku.
“Shumë njerëz flasin për moshën time, por e di që po punoj shumë, si kurrë më parë. Dua të luaj në nivelin më të lartë edhe për disa vite. Ndihem shumë mirë fizikisht. Nuk ka asnjë ndryshim midis disa viteve më parë dhe tani për sa i përket statistikave”, deklaroi Lewandowski.
Më tej, sulmuesi i Barcelonës komentoi: “Ne e dimë se do të luajmë në një nivel të lartë deri në fund të sezonit, pasi tani vështirësia është edhe më e madhe. Nëse do të jemi të fokusuar në cdo ndeshje, do të jemi shumë të rrezikshëm”.
“Për mua gjëja më e rëndësishme është ajo që duhet të bëj për ekipin. E di që nëse shënoj dy gola, do ta ndihmoj ekipin tim. Për mua si sulmues e rëndësishme është të kem më shumë besim. Nëse jam në zonë ose afër saj, e di që nëse topi më vjen, e kam golin në mendjen time”, tha sulmuesi polak.s.n.