Sekretari i përgjithshëm i Ligës Arabe, Ahmed Aboul Gheit tha se sulmet e Izraelit në Rripin e Gazës kanë shkaktuar pasoja jashtëzakonisht negative dhe të rrezikshme rajonale.
Sipas lajmit të agjencisë zyrtare egjiptiane të lajmeve MENA, Aboul Gheit foli në hapjen e sesionit të 13-të të Samitit të Investimeve “AIM 2024” të mbajtur në kryeqytetin e Emirateve të Bashkuara Arabe (EBA), Abu Dabi.
“Sulmet e Izraelit kundër Gazës kanë shkaktuar pasoja jashtëzakonisht negative dhe të rrezikshme rajonale”, tha Aboul Gheit duke shtuar se për shkak të sulmeve në fjalë është ndikuar negativisht sektori i turizmit në vendet fqinje dhe se janë shënjestruar zinxhirët e furnizimit global.
Ai tërhoqi vëmendjen se nga sulmet, janë prekur negativisht edhe të ardhurat nga rruga detare dhe çmimet e energjisë dhe se kjo ndikon negativisht çmimet e ushqimeve dhe mallrave bazë. Sekretari i Ligës Arabe potencon se krizat globale kanë ndikuar negativisht mundësitë për rritje në rajon dhe kanë ndërprerë procesin e zhvillimit gjithëpërfshirës në disa rajone.
“Sulmet e Izraelit që vazhdojnë në Gaza kanë prekur negativisht stabilitetin dhe investimet rajonale. Shënjestrimi nga Izraeli në mënyrë të vetëdijshme ndaj të gjitha investimeve, infrastrukturës dhe fitimeve si dhe kryerja e ‘sulmeve brutale’ ndaj njerëzve në Palestinë pa marrë parasysh ndërgjegjen, humanizmin dhe ligjin e luftës, kanë shkaktuar barrë të rëndë për ekonominë e Palestinës”, tha Aboul Gheit, transmeton Anadolu. Ai më tej bëri thirrje për rritjen urgjente të sasisë së ndihmës që dërgohet në rajon për të lehtësuar kushtet humanitare tragjike që rëndohen çdo ditë e më shumë në Rripin e Gazës.
