Shkrimtari dhe publicisti shqiptar, Fatos Lubonja, ka thënë se e gjithë ajo çfarë po ndodhë sot në botë, me luftën në Ukrainë dhe tmerret në Gaza, janë shkatërrues të mitit se Perëndimi është “tokë e premtuar” për vendet e Ballkanit, raporton Anadolu, transmeton KosovaPost.
Në një diskutim publik me temën “Reimagining the Balkans” që u fokusua tek “Ballkanizimi” dhe “Evropianizmi”, organizuar nga Instituti për Politika Sociale Musine Kokalari dhe Fakulteti i Sociologjisë në Universitetin e Prishtinës, Lubonja tha se shumë nga problemet e Ballkanit sot janë refleks i modelit perëndimor që morën vendet ballkanase pa vështrim kritik.
Lubonja tha figurativisht se vendet e Ballkanit janë në një anije e cila ka drejtimin e gabuar.
“E gjithë çfarë po ndodh sot në botë, me Trumpin në SHBA që është kulmi i kulmeve, me luftën në Ukrainë, me tmerret që po ndodhin në Gaza, janë krejtësisht shkatërrues të mitit të Perëndimit si tokë e premtuar për ne”, theksoi Lubonja
Duke ju referuar Habermasit, i cili flet për shoqëri të dominimit dhe shoqëri të komunikimit, shkrimtari shqiptar tha se në vendet e Ballkanit mbizotërojnë qeverisjet dhe shoqëritë e dominimit.
Por, ai shton se një gjë e tillë është rritur edhe në vendet perëndimore.
“Elementi i dominimit ka dalë në pah në kohët e fundit në Perëndim, i shoqërisë së dominimit. Përmenda Trumpin, po e përsëris, boll të kesh parasysh bullizmin e tij ndaj gjithë shteteve tjera që është rritur shoqëria e dominimit. Tmerri që bënë Izraeli…, Evropa e çoroditur…, (Trump) do të na fusë dhe në luftë”, theksoi tutje Lubonja.
Lubonja tha se riimagjinimi i Ballkanit do të thotë riimagjinim i njëri-tjetrit brenda rajonit.
