Qendra e Lëvizjes Vetëvendosje në Prizren ka ngritur shqetësime publike lidhur me mënyrën e ndarjes së subvencioneve nga Drejtoria Komunale e Kulturës, Rinisë dhe Sportit. Aktivistët e Vetëvendosjes akuzojnë qeverisjen lokale për favorizim të OJQ-ve të krijuara së fundmi. Por nga komuna i mohojnë këto akuza, duke thënë se mjetet janë shpërndarë në bazë të buxhetit që kanë pasur.
Qendra e Vetëvendosjes në Prizren ka ngritur shqetësime lidhur me ndarjen e subvencioneve nga Drejtoria Komunale e Kulturës, Rinisë dhe Sportit. Aktivistët e kësaj partie kërkuan më shumë transparencë në mënyrën e shpërndarjes së mjeteve publike.
“Dyshimet për ndarje të subvencioneve i kemi të bazuara në OJQ, të cilat kanë përfitime të mëdha dhe janë formuar brenda katër viteve të kësaj qeverisjeje. Dyshimet tjera i kemi në ndërhyrje direkte të kryetarit në organizime të festivaleve edhe rrethit të tij”, tha Dafina Alishani, LVV, dega në Prizren.
“Ajo që është bërë në emër të përkrahjes për kulturën është, në fakt, një përvetësim i saj. Dy festivalet që janë subvencionuar me mjete të konsiderueshme janë iniciativa të vetë kryetarit Totaj, ndërsa përfitues të tjerë janë familjarë të stafit të tij, apo individë dhe klube që kanë lidhje të qarta rajonale apo politike me qeverisjen aktuale”, tha Ilir Gashi, LVV, dega në Prizren.
Vetëvendosje në Prizren u bën thirrje organeve hetimore që të hetojnë thirrjen e fundit nga DKRS për subvencionimin e projekteve kulturore në Komunën e Prizrenit./KosovaPost/
