Komisioni Qendror Zgjedhor sot mori vendim për lirimin e mbi 3 mijë kutive të votimit, në të cilat ndodhet materiali zgjedhor nga procese të ndryshme zgjedhore 2014 – 2021.
Materiali zgjedhor në këto kuti, të cilat janë objekt i hetimit nga institucionet e drejtësisë, do të vendosen në thasë të veçantë nga një komision i përkohshëm dhe sipas procedurës së caktuar.
“Zbatimi i këtij vendimi do të lirojë edhe hapësirën e depos së Komisionit Qendror Zgjedhor me qëllim të përgatitjeve të zgjedhjeve lokale këtë vit”, thuhet në njoftim.
Tutje në njoftim bëhet e ditur se në vazhdim të mbledhjes, KQZ mori vendim për ndalimin e mjeteve për subjektet politike parlamentare ndaj të cilave Paneli Zgjedhor për Ankesa dhe Parashtresa ka shqiptuar gjoba gjatë fushatës së zgjedhjeve për Kuvendin e Kosovës, të mbajtura më 9 shkurt 2025.
“Mjetet e ndaluara nga Fondi për mbështetjen e subjekteve politike do të transferohen në xhirollogarinë e PZAP-it dhe vendimi i KQZ-së do të zbatohet me tri ndalesa gjatë ndarjes së mjeteve, në tre tremujorët e ardhshëm”, thuhet në njoftim.
Sipas njoftimit thuhet se LVV nuk ka paguar asnjë shumë të gjobës, e cila është 212.500 euro. Edhe PDK nuk ka paguar gjobën në vlerë prej 144.500 euro.
Ndërsa LDK ka paguar vetëm 65 mijë euro nga shuma totale e gjobës prej 136.600 euro. As koalicioni AAK-NISMA nuk ka paguar gjobën në vlerë prej 72.300 euro. /Telegrafi/
