“Daily Mail” ka dhënë një lajm mjaft të rëndësishëm këtë të enjte: Manchester United është gati të braktisë mitikun “Old Trafford” për ndërtimin e një stadiumi të ri që do të kushtonte 2 miliardë paundë.
Kështu “Teatri i Ëndrrave” do të rrafshohej pas 114 vitesh histori për të krijuar vend për një objekt të ri me kapacitet 100,000 vende.
Këtë verë u zbulua plani për të reduktuar stadiumin aktual në 30,000 vende për të ruajtur historinë e klubit dhe për të siguruar një shtëpi për ekipet dhe akademitë e femrave.
Por sipas informacioneve të mbledhura nga tabloidi anglez, drejtuesit e “Djajve të Kuq” e kanë kuptuar se projekti është i parealizueshëm dhe kushton në mënyrë disproporcionale.
Megjithatë, në rast se “Old Trafford” do të shkatërrohet, është krijuar një grup studimi që mund të ruajë elementet historike (nga ora e Mynihut deri te tuneli përkujtimor i fatkeqësisë ajrore të vitit 1958, si dhe statujat e legjendave nga historia e United).
Nëse merret një vendim përfundimtar deri në fund të vitit, punimet ndërtimore në objektin e “Djajve të Kuq” mund të përfundojnë rreth vitit 2030. Ndryshe, opsioni i rizhvillimit të “Old Trafford”, që kushton gjysmën e shumës, mbetet ende në tavolinë.
Dy faktorët kyç në vendimmarrje do të jenë financat dhe opinioni i fansave. United sigurisht që do të shmangë rritjen e borxhit për stadiumin dhe e vetmja mundësi për bashkëpronarin e klubit do të jetë sigurimi i financimit privat.s.n.
