Ministri i Mbrojtjes, Ejup Maqedonci është takuar sot me komandantin e KFOR-it, gjeneralmajor Ozcan Ulutas, përcjell KosovaPost.
Me anë të një postimi në Facebook, Maqedonci tha se temë kryesore e takimit me Ulutas ishte situata e sigurisë në Kosovë.
“Temë qëndrore e takimit ishte situata e sigurisë në vend, intesifikimi i patrullimit kufitar nga ana e trupave të KFOR-it duke marrur për shkas sulmin e 24 shtatorit, e po ashtu rritja e bashkëpunimit me Forcën e Sigurisë së Kosovës në çështje të mbrojtjes”, ka shkruar Maqedonci.
Mes tjerash, ministri theksoi se bashkëpunimi mes Policisë së Kosovës, KFOR-it dhe FSK-së ofron stabilitet dhe siguri për qytetarët në vend.
‘Ruajtja e kufirit do të thotë ngritje e nivelit të sigurisë, mbyllje e rrugëve ilegale dhe luftim i grupeve kriminale nga ana e Policisë së Kosovës. Ky bashkëpunim Polici e Kosovës, KFOR, FSK, ofron siguri dhe stabilitet për gjithë qytetarët dhe vendin tonë”, tha Maqedonci.
