Ka disa javë që KESCO ka filluar fushatën e përditësimit të të dhënave të konsumatorëve. Deri tash, mbi pesë mijë konsumatorë e kanë përfunduar këtë proces.
Në zyret e përkujdesit ndaj konsumatorëve që KESCO ka anëkend Kosovës, çdo ditë janë duke ardhë për përditësim mbi 500 konsumatorë.
Kjo bën që procesi të shkojë me ritme të kënaqshme, duke e përmbushur secili një obligim ligjor që rregullon marrëdhëniet kompani-konsumator, sikurse ndikon direkt edhe në mirëfunksionimin e sektorit elektroenergjetik.
Përditësimi i të dhënave pos që është kusht ligjor, ka edhe përfitime të shumëanshme. Konsumatorët që e kryejnë këtë proces sigurohen që faturën e energjisë elektrike do ta pranojnë pikërisht në objektin ku jetojnë. Qasjen në informata të shpejta rreth furnizimit me energji elektrike e kanë të garantuar, mund të paraqesin lehtësisht kërkesa apo ankesa dhe askush nuk mund të iu lë asnjë borxh.
Rëndësia e përditësimit të të dhënave rritet shumë sidomos tek rastet kur konsumatorët kanë njehsor, por nuk është në rastin e tyre, pastaj kanë ndryshuar vendbanim, kanë qiramarrës, e kanë ndryshuar numrin e telefonit apo e kanë një numër tjetër aty dhe e kanë blerë apo shitur shtëpinë pas përditësimit të fundit të të dhënave.
Konsumatorët hyjnë në limite kohore vetëm kur i njofton KESCO përmes kontaktimit të drejtpërdrejtë. Në momentin që kompania i kontakton ata, atëherë konsumatorët duhet të bëjnë përditësimin brenda dy javësh. Pas kësaj periudhe mund të jenë subjekt i shkyçjes nga rrjeti elektrik. Pra, vetëm konsumatorët që kontaktohen janë subjekt i shkyçjes.
