Nëse bota nuk reagon ndaj krimeve të kryera nga Izraeli, edhe ajo do të mbajë përgjegjësi për këto krime, tha mbreti i Jordanisë, Abdullah II, transmeton Anadolu.
Duke iu drejtuar Parlamentit Evropian, Mbreti jordanez tha: “Nëse bota nuk vepron me vendosmëri, do të jetë bashkëpunëtore në krimet e Izraelit”.
Duke iu referuar veçanërisht katastrofës humanitare dhe vdekjeve masive në Rripin e Gazës, ai shtoi: “Ajo që po ndodh sot në Gaza sfidon ligjin ndërkombëtar, standardet morale dhe vlerat tona të përbashkëta. Dhe ne po dëshmojmë shkelje pas shkeljeje në Bregun Perëndimor, me situatën që përkeqësohet çdo ditë”.
Ai ka vënë në dukje se formimi i një shteti të pavarur palestinez përmes diplomacisë, siç sugjerohet nga rezoluta të shumta të OKB-së, është e vetmja zgjidhje e realizueshme dhe e drejtë për problemin dekadash të vjetër. “Sepse miqtë e mi, palestinezët, si të gjithë njerëzit, meritojnë të drejtën për liri, sovranitet dhe po, shtetësi”, tha ai.
Duke refuzuar thirrjet ndërkombëtare për armëpushim, ushtria izraelite ka ndërmarrë një ofensivë brutale kundër Gazës që nga tetori i vitit 2023, duke vrarë mbi 55.400 palestinezë, shumica prej tyre gra dhe fëmijë.
Nëntorin e kaluar, Gjykata Ndërkombëtare Penale lëshoi urdhër-arreste për kryeministrin izraelit, Benjamin Netanyahu dhe ish-ministrin e tij të Mbrojtjes, Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi gjenocidi në Gjykatën Ndërkombëtare të Drejtësisë për luftën e tij në enklavë.
Duke tërhequr vëmendjen gjithashtu te sulmet e Izraelit ndaj Iranit, mbreti i Jordanisë tha se sulmet përbëjnë një rrezik për sigurinë dhe stabilitetin e të gjithë rajonit dhe për këtë arsye janë një kërcënim për të gjithë.
