Politikanët e Kosovës shpesh i shohim në tribunën VIP të stadiumit “Fadil Vokrri” kur luan kombëtarja e Kosovës.
Mirëpo ka nga ata që janë tifozë të skuadrave evropiane dhe nuk hezitojnë që skuadrën e tyre të zemrës ta ndjekin edhe në stadiume, shkruan Indeksonline.
Indeksonline ka zgjedhur disa nga politikanët më tifozë që ka Kosova dhe që shpesh i shohim në arenat më të mëdha evropiane.
Presidentja Osmani, kryeministri Kurti dhe kryeparlamentari Konjufca, përvec ndeshjeve të Kosovës nuk kanë shprehur publikisht admirimin për ndonjë skuadër.
Më poshtë janë emrat e disa politikanëve dhe klubet që ata përkrahin.
HASHIM THAÇI – AC MILAN
Ish-presidenti i Kosovës ka qenë i lidhur me futbollin si i ri. Përvec si futbollist aktiv, ai ka shprehur edhe admirimin e tij për futbollin. Thaçi në intervistat e tij ka shprehur pëlqimin për skuadrën e Milanit
RAMIZ LLADROVCI – BAYERN MUNCHEN
Kryetari i Komunës së Drenasit është një nga tifozët më të mëdhenj të futbollit. Përveç ndeshjeve të Kosovës që i ndjek shpesh edhe si mysafir, i pari i Drenasit është edhe tifoz me gjigantët e Gjermaisë, Bayern Munchen.
Ai shpesh ka ndjekur ndeshjet në “Allianz Arena” dhe ka postuar fotografi me fanellën e Bayernit.
LUMIR ABDIXHIKU – AC MILAN
Kryetari i LDK-së ka shprehur admirimin e tij për Milanin. Ai shihet shpesh duke e ndjekur skuadrën italiane edhe nga stadiumi. Abdixhiku ka mbështetur Milanin edhe në kohë të vështira.
FATMIR LIMAJ – BARCELONA
Kryetari i NISMA-s është deklaruar se është tifoz me skuadrën e Barcelonës. Ish-ministri i infrastrukturës madje ka qenë edhe si i ftuar special i presidentit Josep Maria Bartomeu.
AVDULLAH HOTI – LIVERPOOL
Avdullah Hoti është tifoz i zjarrtë i Liverpoolit. Ish-kryeministri është parë shpesh duke publikuar statuse në rrjetet sociale në përkrahje të “Reds-ave”.
PËRPARIM RAMA – LIVERPOOL
Edhe pse ka jetuar në Londër, Përparim Rama është një tifoz i Liverpoolit. Edhe pse nuk ka publikuar ndonjë fotografi, gjatë fushatës zgjedhore, i pari i Prishtinës ka shprehur admirimin e tij për skuadrën që aktualisht drejtohet nga Klopp.
BEKIM HAXHIU – MANCHESTER UNITED
Deputeti i PDK-së, Bekim Haxhiu në një intervistë për mediat në Kosovë ka deklaruar se është tifozë i Manchester United. Kujtojmë se deputeti Haxhiu është shumë aktiv në futbollin vendor.
LUTFI HAZIRI – ARSENAL
Lutfi Haziri është deklaruar se është një tifoz i skuadrës së Arsenalit. Në një postim në rrjetet sociale, Haziri krahas emrit të Dritës dhe Gjilanit, ka shkruar emrin e skuadrës së Arsenalit.
FATO PECI – AC MILAN
Ministri Faton Peci ka qenë tifoz i Milanit. Në një intervistë ai ka deklaruar se ka ndjekur me shumë fanatizëm skuadrën italiane.
RAMUSH HARADINAJ – LIVERPOOL
Ramush Haradinaj duket se është një tifozë i Liverpoolit. Edhe pse nuk e ka shprehur në publik, kryetari i AAK-së është parë në maratonën e Prishtinës me fanellën e Liverpoolit.
BEHXHET PACOLLI – MANCHESTER UNITED
Behxhet Pacolli nuk ka folur ndonjëherë për admirimin e skuadrës së Manchester United. Mirëpo, emri i ish-presidentit të Kosovës është përmendur si i mundshëm për të blerë gjigantin anglez.
