Interesi i Al Hilal për Nicolò Barella-n është i kahershëm. Oferta e parë e madhe kishte mbërritur gjatë merkatos së dimrit, kur mesfushori e kishte refuzuar me mirësjellje, duke treguar dëshirën e tij për të qëndruar te Interi. Por klubi arab nuk është nga ata që heqin dorë lehtë nga objektivat e tyre dhe po planifikon një ofertë të re me shifra marramendëse për ta bindur Barellën të largohet nga Serie A drejt Pro Saudi League.
Në janar flitej për një pagë prej 18 milionë eurosh, por këtë herë, sipas informacioneve që vijnë nga Arabia dhe raportohen nga ‘La Gazzetta dello Sport’, bëhet fjalë për një kontratë katërvjeçare me një vlerë totale prej 140 milionë eurosh (35 milionë euro në vit).
Al Hilal, që nuk ka probleme buxhetore dhe tashmë është “çliruar” nga paga e Neymar-it, i cili është rikthyer në Brazil, synon një goditje të madhe në verë, në prag të Kupës së Botës për Klube.
Barella është në krye të listës së trajnerit Jorge Jesus. Nuk ka ende një ofertë zyrtare, por burime nga Arabia thonë se në pranverë do të kalojnë në fazën operative.
Nëse do ta pranonte ofertën arabe, Barella do të bëhej futbollisti italian më i paguar në histori. Aktualisht, rekordi mbahet nga Graziano Pellè, i cili në Kinë fitonte 15 milionë euro në vit. Por ky primat nuk e tundon zv/kapitenin e Interit, i cili, përkundrazi, synon të qëndrojë gjatë në Milano.
Me një kontratë të rinovuar vitin e kaluar, e vlefshme deri në 2029, dhe një pagë prej 6.5 milionë eurosh në vit (që gjithsesi e bën lojtarin italian më të paguar në Serinë A), Barella ndihet mirë si në Milano, ashtu edhe tek Interi.
Në mendjen e tij nuk janë thirrjet arabe, por dëshira për të fituar trofe të tjerë me zikaltrit. Dhe kjo është edhe dëshira e klubit kampion të Italisë: siç thuhet, martesat bëhen me dy, dhe kjo duket se do të zgjasë për një kohë të gjatë.
