Djemve shtetas kroatë që këtë vit bëhen madhorë po u shkojnë në adresat e shtëpisë ftesa për t’u paraqitur në zyrën rajonale të mbrojtjes për t’u përfshirë në regjistrin ushtarak. Ftesat u dërgohen nga Ministria e Mbrojtjes, e cila në këtë mënyrë po përgatitet për zbatimin e stërvitjes së detyrueshme ushtarake dy-mujore që është paralajmëruar.
Ajo, siç u konfirmua këto ditë nga Ministria e Mbrojtjes (MORH), sipas JutarnjiList pritet të përcaktohet me ndryshimet dhe plotësimet e afërta të Ligjit për Mbrojtjen, të cilat Qeveria do t’i vërë për diskutim publik në qershor, ndërsa Kuvendi do t’i miratojë në vjeshtë.
Të rinjtë, të cilët zakonisht janë ende nxënës të shkollave të mesme, ftesat për t’u paraqitur për regjistrim në evidencën ushtarake i marrin në emër të tyre, pavarësisht nëse i kanë mbushur tashmë 18 vjeç në muajt e parë të këtij viti apo do t’i mbushin deri në fund të këtij viti. Këto ftesa, megjithatë, kanë shqetësuar një pjesë të prindërve, djemtë e të cilëve në atë moment janë ende të mitur apo në prag të maturës, dhe nuk janë të sigurt se çfarë do të thotë kjo për të ardhmen e tyre – a do të jetë kjo stërvitje e detyrueshme menjëherë pas shkollës, a do të ndikojë në planifikimet për studime, punë apo udhëtime jashtë vendit.
Nga Ministria e Mbrojtjes theksojnë se për momentin nuk bëhet fjalë për rekrutim apo mobilizim të të rinjve, por vetëm për përgatitje të evidencës ushtarake si pjesë e sistemit të mbrojtjes që, sipas tyre, është detyrim ligjor. Stërvitja e detyrueshme dy-mujore, që përmendet në propozimet e reja të ligjit, do të zbatohet vetëm pasi të miratohen ndryshimet në Kuvend dhe pasi të përcaktohet mënyra e zbatimit përmes akteve nënligjore, shkruan gazeta express.Megjithatë, reagimet e publikut dhe sidomos të prindërve tregojnë se një pjesë e shoqërisë ende ka rezerva apo frikë nga rikthimi i shërbimit të detyrueshëm ushtarak, i cili në Kroaci ishte pezulluar në vitin 2008.
