Vedat Muriqi është referencë e Majorkës, brenda dhe jashtë fushës. Sulmuesi 30-vjeçar kosovar është shndërruar në idhull për tifozët dhe gjithçka tregon se kështu do të vazhdojë të paktën deri në fund të sezonit.
Në orët e fundit, mediet turke kanë shpjeguar se Muriqi është objektiv i Fenerbahçes së Mourinhos, duke qenë se klubi i Stambollit po përgatitet për një shitje të mundshme të ish-lojtarit të Sevillas, En Nesyri.
José Mourinho, trajner i Fenerbahçes, është i hapur për nënshkrimin e një sulmuesi ideal për të zëvendësuar Youssef En Nesyrin. Marokeni, 30 vjeç, është në listën e Al-Nassr, ku do të mund të luante krah Ronaldos. Fenerbahçe është në pritje të një oferte prej 30 milionë eurosh për t’i dhënë dritën jeshile transferimit.
Muriqi është menduar nga drejtuesit e Fenerbahces për të zëvendësuar marokenin, por sipas gazetës ‘As’, menaxheri i tij e përjashton lëvizjen në këtë merkato të janarit.
Ylli kosovar, i cili luajti 14 ndeshje për ekipin e tij në sezonin 2024-25, ka shënuar 3 gola dhe ka dhënë 2 asistime. Ky është sezoni i tij i katërt në Mallorca, ku mbërriti nga Lazio.s.n.
