Ministri në detyrë i Financave, Hekuran Murati dhe deputetja e Lidhjes Demokratike të Kosovës, Hykmete Bajrami, kanë zhvilluar një debat në distancë lidhur me të dhënat e fundit të Bankës Botërore për popullsinë në Kosovë, transmeton KosivaPost.
Deputetja Bajrami, përmes një postimi në rrjetet sociale, ka theksuar se raporti e rendit Kosovën të parën në botë për nga shkalla e tkurrjes së popullsisë, duke e lidhur këtë me politikat qeverisëse.
“Derisa deputetët uzurpatorë të zyrave të qeverisë krekosen për zhvillim ekonomik, Banka Botërore ua rrëzon krejt propagandën: ‘Kosova është vendi i parë në botë për nga shkalla e tkurrjes së popullsisë’. A po e kuptoni? Më shumë njerëz ikin nga Kosova se sa nga vatrat e luftës. Prej kujt po ikin qytetarët? Prej lulëzimit ekonomik?”, ka shkruar deputetja e LDK-së në Facebook.
E ndaj kësaj deklarate ka reaguar ministri Murati, i cili përmes një postimi në Facebook tha se të dhënat e publikuara nga Banka Botërore nuk tregojnë se brenda një viti Kosovën e kanë lëshuar 160 mijë qytetarë, por se bëhet fjalë për korrigjim statistikor pas regjistrimit të popullsisë në vitin 2024.
“Deri diku mund të kuptoj ata që nuk i njohin statistikat, por kur këtë e bën dikush që pretendon se është ligjërues në universitet, siç është deputetja Bajrami, atëherë janë dy mundësi: ose ajo po manipulon me vetëdije, ose vërtetë beson në atë që ka thënë. Në rastin e dytë, duhet të brengosemi për cilësinë e studentëve që prodhon ky lloj profesorësh”, ka shkruar Murati.
Ai ka sqaruar se Banka Botërore ka marrë të dhënat e Agjencisë së Statistikave të Kosovës (ASK), të cilat tregojnë se në vitin 2023 popullsia e vlerësuar ka qenë 1.76 milionë banorë, ndërsa sipas censusit të vitit 2024 ka dalë të jetë 1.6 milionë.
“Pra, nuk thuhet askund që vendin e kanë lëshuar 160 mijë persona brenda një viti, por thjesht është korrigjim statistikor nga vlerësimi i përafërt i vitit 2023 në shifrën faktike të censusit 2024”, ka theksuar ai.
Kjo nënkupton se vlerësimi i viteve paraprake nga ASK ka qenë i gabuar, sepse herën e fundit kur ishte bërë numërimi i popullsisë ka qenë viti 2011, dhe prej atëherë ASK ka bërë vetëm vlerësim. E përgjatë vlerësimit nëpër vite në periudhën 2011-2023, shihet se ASK nuk ka arritur të përfshijë me saktësi largimin e popullsisë gjatë kësaj periudhe.
E ka qenë pikërisht viti 2014 dhe 2015 kur Kosova kishte përjetuar ekzod të ikjes të paparë, kur Hykmete Bajrami me partinë e saj patën tradhëtuar besimin e qytetarëve dhe patën shkuar në koalicion me PDK-në dhe Listën Serbe – pak a shumë siç po tentojnë të bëjnë edhe tani.
Sipas Muratit, kjo tregon se vlerësimet e ASK-së për periudhën 2011-2023 nuk kanë arritur të përfshijnë me saktësi largimin e popullsisë, i cili kryesisht ka ndodhur në vitet 2014-2015, kur sipas tij partitë që sot janë në opozitë kishin marrë vendime politike që ndikuan në besimin e qytetarëve.
