Ministri në detyrë i Financave, Hekuran Murati, ka reaguar pas dështimit të miratimit të disa dokumenteve kyçe financiare në Kuvend, duke akuzuar opozitën për “veprim destruktiv” dhe tentim për ta lënë shtetin pa funksionim.
Murati tha se opozita ka refuzuar të votojë:
- Buxhetin prej 4 miliardë euro për vitin 2026,
- Marrëveshje ndërkombëtare në vlerë 1 miliard euro,
- Buxhetin e tri komunave për 2025,
- Buxhetin e RTK-së.
Sipas tij, kundërshtimi nuk lidhej me përmbajtjen, por me një strategji politike për të krijuar krizë institucionale.
“Nuk i votuan, jo se kishin ndonjë kundërshtim me përmbajtjen, por sepse menduan që duke e bllokuar shtetin e duke i lënë qytetarët pa paga, faji do t’i mbetej Albin Kurtit,” shkroi Murati.
Ai shtoi se qytetarët “do ta mbajnë mend këtë veprim destruktiv” dhe se më 28 dhjetor “do të tregojnë me votë se kush i ka penguar proceset financiare të vendit”.
