Deputetja e PDK-së, Ganimete Musliu, ka thënë se i arratisuri nga Burgu i Smrekonicës, Faton Hajrizi, i cili u vra nga policia serbe ishte produkt i sistemit të drejtësisë së Kosovës dhe asaj të UNMIK-ut.
Musliu tha se Faton Hajrizi u vra edhe nga sistemi i drejtësisë së Kosovës, teksa shtoi se tani ai i braktisur edhe nga shteti i vet, krejtësisht i vetmuar u vra nga serbët.
“Faton Hajrizi ishte produkti i sistemit të drejtësisë së Kosovës dhe asaj të UNMIK-ut. E gjithë historia e tij është e trishtë. Para se të gjykohet apo paragjykohet, duhet pyetur: A pati ky djalë ndonjëherë një mundësi reale për t’u risocializuar? A u maltretua nëpër burgje apo pati trajtim korrekt? A duhet të marrë dikush përgjegjësi për këtë rast”, shkroi Musliu, transmeton Klankosova.tv.
Faton Hajrizi u vra sot nga policia serbe pasi ishte në kërkim si i dyshuar për vrasjen e një polici serb dhe plagosjen e një tjetri.
Ai, javë më parë u arratis nga Burgu i Smrekonicës, e që ishte arratisja e tij e nëntë.
