Me rastin e fillimit të vitit të ri shkollor, Myftiu i Kosovës, Naim ef. Tërnava, ka drejtuar një urim për nxënësit, mësuesit, prindërit dhe gjithë qytetarët, duke e cilësuar edukimin si një mision të shenjtë, transmeton Kosova Post.
Në mesazhin e tij, Myftiu Tërnava ka theksuar fjalët e Profetit Muhamed a.s. se “Nxënia e diturisë është obligim për çdo besimtar dhe besimtare”, duke shtuar se 1 shtatori është ditë e veçantë për fëmijët, prindërit dhe mësuesit.
“Ditën e parë të shkollës ua uroj me zemër të gjithë nxënësve tanë anekënd atdheut tonë të dashur, mësuesve, arsimtarëve dhe profesorëve që kontribuojnë në edukimin e brezave, si dhe prindërve që nuk kursejnë asgjë për shkollimin e fëmijëve të tyre. Në veçanti uroj të gjithë shkollarët që sot për herë të parë do të ulen në bankat shkollore”, është shprehur Tërnava.
Ai ka theksuar detyrimin e prindërve për të edukuar dhe arsimuar fëmijët me vlera të larta morale, duke shtuar se ky mision i shenjtë mund të arrihet vetëm me kujdes familjar dhe bashkëpunim të ngushtë me shkollat.
“Kështu do t’i ofrojmë shoqërisë fëmijë të edukuar dhe të arsimuar, të cilët do të jenë të dobishëm për familjen, vendin dhe kombin”, ka theksuar më tej Myftiu i Kosovës.
Në fund, Tërnava ka lutur Zotin që ky vit shkollor të sjellë suksese, ngritje të cilësisë dhe kultivim të virtyteve morale, duke nënvizuar se rezultatet nuk mungojnë kur ka punë, angazhim dhe këmbëngulje.
