Rey Manaj deklaroi në konferencë për shtyp se pas ndeshjes ndaj Kroacisë, lojtarët e Kombëtares ishin paksa të zhgënjyer për shkak se mendonin se mund ta kishin fituar ndeshjen.
“Mund të kishim arritur 3 pikët. Goli i dytë mund të jepej faull, por gjyqtari tha që nuk kishte asgjë nga VAR-i. Pak pishman, pasi mund të kishim fituar. Mund ta menaxhonim më mirë pjesën e dytë, por jemi të kënaqur me barazimin. Tani duhet të fitojmë ndaj Spanjës. Kemi më shumë shanse nëse fiton sonte Spanja. Shpresoj të bëjmë historinë. Spanja është ekip shumë i madh. Po mundi sot Italinë, do të kemi më shumë shpresa. Kanë lojtarë me shumë kualitet si Rodri, Lamine Yamal apo Morata. Të bëjmë ndeshjen tonë dhe të japim 100%, nga minuta e parë deri te e fundit”, tha Manaj.
Manaj iu kthye edhe ndeshjes ndaj Italisë, duke theksuar se goli shumë i shpejtë që shënuam i bëri dëm kuqezinjve: “Goli i shpejtë me Italinë na bëri të uleshim shumë. Ndërkohë që ndaj Kroacisë pjesa e parë ishte ndër më të mirat e viteve të fundit. Goli i parë i pësuar na demoralizoi, na destabilizoi pak, por patëm forcë me golin e Klausit dhe atë që dhanë lojtarët e ardhur nga stoli”.
“Atmosfera? Ekipi është shumë i motivuar. Ndeshja e fundit është ndeshje brenda ose jashtë. Të gjithë do të jemi të përqendruar në maksimum. Emocionet janë të mëdha, gjithë Shqipëria dhe gjithë bote ndjek këto ndeshje. Të futemi në fushë të përqendruar, që të mund të fitojmë dhe të kalojmë grupin. Të gjithë ne lojtarët atë duam, të fitojmë ndaj Spanjës dhe të gëzojmë gjithë shqiptarët”, shtoi Manaj./A2cnn
