Policia e Kosovës ka njoftuar se ka arritur që të parandalojë tri raste të kontrabandës me mallra, pasi ka kapur në flagrancë mallra ushqimore serbe e cigare të futura ilegalisht në Kosovë
Në rastin e parë, Policia bën të ditur se ka bastisur shtëpinë e të dyshuarit në fshatin Rogoçicë të Kamenicës, ku ka gjetur dhe sekuestruar produkte ushqimore me origjinë serbe.
“Më datë 09.10.2024 pas marrjes së informatave për kontrabandim të mallrave nga Serbia në Kosovë nga njësitet e lartcekura është kryer një kontroll në shtëpinë e personit të dyshuar në fshatin Rogoçicē, komuna e Kamenicës. Gjatë kontrollit është hasur në mallra ushqimore prodhim serbe të cilat dyshohet se janë kontrabanduar nga Serbia në Kosovë. Lidhur me rastin me urdhër të prokurorit kompetent malli sekuestrohet dhe dërgohet në terminalin doganor-Dheu i Bardhë dhe procedohet nga njësitet e Doganës së Kosovës”, thuhet në njoftim.
Gjithashtu sipas policisë bëhet e ditur se po të njëjtën ditë, policia ka ndalur për kontroll një veturë me targa serbe, ku ka gjetur 14 pako me cigare pa dokument mbi prejardhjen e mallit e në vlerë të 15 mijë eurove.
I dyshuari, shtetas serb, është ndaluar për 48 orë.
“Më datë 09.10.2024 nga njësitet Task Forcës-Lindje është ndaluar një veturë me targa serbe drejtuar nga i dyshuari shtetas i Serbisë. Gjatë kontrollit është vërejtur se në veturë kishte të ngarkuara 14 pako me cigare pa asnjë dokument mbi prejardhjen e mallit, gjithsej 140000 mi copë cigare në vlerë rreth 15.000€. Me urdhër të prokurorit kompetent , malli dhe automjeti sekuestrohen dhe janë dërguar në terminalin doganor-Dheu i Bardhë, ndërsa i dyshuari është ndaluar për 48 orë”, thuhet në njoftimin e policisë.
Edhe në rastin e tretë janë gjetur mallra të ndryshme si cigare të llojeve të ndryshme, pa banderola, të sjella ilegalisht në territorin e Kosovës.
“Më datë 09.10.2024 pas marrjes së informatave për kontrabandim të mallrave nga Serbia në Kosovë, nga njësitet e lartcekura është kryer një kontroll në shtëpinë e të dyshuarit kosovar nga Kamenica. Gjatë kontrollit është hasur në mallra si duhan, cigare të llojeve të ndryshme me prejardhje serbe dhe pa banderolla, filtera për cigare etj, dyshohet se janë sjellë në mënyrë ilegale në Kosovë”, thuhet në komunikatën e Policisë.
Po ashtu, Policia bën me dije se janë gjetur edhe 320 monedha 2 euroshe, të cilat dyshohet se janë të falsifikuara.
Për këtë është arrestuar një person i dyshuar.
“Përveç mallrave të lartcekura janë hasur edhe monedha metali nga 2 € gjithsej 640€ të cilat dyshohet se janë të falsifikuara, ku nga Drejtoria për Hetimin e Krimeve Ekonomike dhe Korrupsionit- përkatësisht Njësia Rajonale në Gjilan (NJRHKEK-Gjilan) është inicuar rasti ‘Falsifikim i Parasë’ nga neni 296 i KPRK-së. Me urdhër të prokurorit kompetent në Gjilan, malli dhe automjeti sekuestrohen dhe dërgohet në terminalin doganor-Dheu i Bardhë, ndërsa i dyshuari është ndaluar për 48 orë”, thuhet në njoftim.
