Nënkryetari i Lidhjes Demokratike të Kosovës njëherit kryetari i Komunës së Pejës, Gazmend Muhaxheri, ka pretenduar se ministri i Punëve të Brendshme të Kosovës, Xhelal Sveçla, është në koordinim me ministrin e Punëve të Brendshme të Serbisë, kur në pyetje është konfiskimi i shpeshtë i arsenalëve të armatimit në Veri të Kosovës.
“Prej Banjës a e dini sa armatimi është konfiskuar, çdo dytën ose të tretën javë del Sveçla dhe thotë se u konfiskua ky armatim, ai armatim, a e kanë zënë një person në Veri që e ka pasur atë armatim, a e ka burgosur vetëm një njeri me atë armatim”, ka potencuar fillimisht ai në një intervistë për Klan Kosova.
A duhet ta lodhim pak mendjen edhe me mëndu se ky qenka duke u koordinuar me ministrin e Punëve të Brendshme të Serbisë”, ka shtuar ai duke potencuar se “konfiskohet armatimi, asnjë njeri nuk arrestohet. Duhet të bëhet pyetja kush e ka sjellë atë armatim, kush e ka konfiskuar atë armatim, kujt i duhet ajo politikë”.
Ministri i Punëve të Brendshme të Kosovës, Xhelal Sveçla dhe Drejtori i Policisë së Kosovës, Gazmend Hoxha, në një konferencë për media të martën në mbrëmje, kanë njoftuar se janë konfiskuar një sasi e konsiderueshme e armatimit në pjesën veriore të Kosovës, që dyshohet se kanë mbetur aty pas sulmit terrorist të 24 shtatorit të vitit të kaluar në Banjë të Zveçanit.
Hoxha, gjatë fjalimit në një konferencë të jashtëzakonshme ka potencuar se lidhur me këtë armatim Policia e Kosovës ka siguruar informacione nga qytetarët dhe Agjencia e Kosovës për Inteligjencë (AKI).
Sipas tij bastisjet janë kryer në rrethinën e Komunës së Zveçanit, konkretisht te pjesa e Rudarës.
Hoxha ndër të tjera ka potencuar se në mesin e pajisjeve të konfiskuara janë rreth 1 mijë e 500 municione, 10 armë të gjata, 62 shok-bomba, eksplozivë, radio-lidhje, karikatorë të mbushur e të zbrazët, dhe një uniformë e ushtrisë serbe.
Lidhur me këtë rast, Hoxha, ka thënë se tashmë është ndaluar për intervistim një person i cili ka qenë ish-zyrtar i Policisë së Kosovës, pasi dyshohet se është i lidhur me armët, të cilat janë gjetur në afërsi të shtëpisë së tij.
