Është hapur edicioni i 20 i Festivalit “Ditët e Komedisë Shqiptare” në Shtëpinë e Kulturës “Abdulla Krashtica” në Preshevë.
Nata e parë u hap me shfaqjen teatrale “Bouncers”, e cila u shfaq para publikut të Luginës së Preshevës, shkruan KosovaPost.
Të pranishëm ishin edhe ambasadori i Republikës së Shqipërisë në Beograd, Bardhyl Cana, kryetarja e Komunës së Preshevës Ardita Sinani, zëvendëskryetari Ragmi Mustafa dhe artistë e artëdashë nga të gjitha torjet shqitare.
Drejtori i Shtëpisë së Kulturës “Abdulla Krashtica” në Preshevë, Naser Nuredini, tha se ndihet e kënaqur të realizojnë edicionin e 20 të Festivalit “Ditët e Komedisë Shqiptare”.
Ai tregoi se në këtë festival janë trupat teatrore nga të gjitha trojet shqiptare, si nga Shqipëria, Kosova, Maqedonia e Veriut dhe Teatri i Preshevës.
Drejtori Nuredini, tha se festivali ka karakter garues, kurse për çmimet e festivalit vendos juria profesionale.
“Këtë vit po realizohet edicioni i 20-të i festivalit, një jubile shumë i rëndësishëm kulturor”, tha Naser Nuredini.
Drejtori më tej shtoi se për gjashtë ditë radhazi Teatri i Qytetit, janë mikpritësit e preshevarëve dhe mysafirëve nga gjithë anët e shqiptarisë.
Shfaqja “Bouncers”përshkruan një natë tipike në një qytet përmes katër rojeve të sigurisë – Eric, Judd, Les dhe Ralph – që punojnë në një klub nate.
Katër aktorët luajtën edhe shumë personazhe të tjerë, si vajza që përgatiten për mbrëmje, djem të zhurmshëm, DJ dhe klientë të dehur.
Me ritëm të shpejtë dhe humor të zi, vepra ofron një pasqyrë satirike të jetës urbane natën, duke trajtuar tema si maskilizmi, marrëdhëniet gjinore dhe identiteti në shoqërinë moderne.
Regjia është bërë nga Kastriot Saqipi, asistent regjie: Edonis Gashi, aktorë: Bleron Hevziu, Erion Fetahu, Elza Krasniqi dhe Muhamed Tertini. Ndërsa koreografia është bërë nga Blerta Fanaj.
Festivali vijon sonte në natën e dytë me premierën e shfaqjes “Vetmi në perendim”, prodhim i Teatrit të Preshevës.
