Një person u vra dhe 11 të tjerë u plagosën nga një sulm me raketë balistike në një bllok apartamentesh në qytetin qendror të Ukrainës, Kryvyi Rih, thanë zyrtarët lokalë të martën dhe Kievi dënoi sulmin në prag të Krishtlindjeve.
“Përbindëshat goditën drejtpërdrejt një bllok banimi katërkatësh me 32 apartamente”, shkroi në Telegram kreu i administratës ushtarake të qytetit, Oleksandr Vilkul.
Një burrë, trupi i të cilit ishte nxjerrë nën rrënoja, nuk mund të ringjallej nga mjekët, tha guvernatori rajonal, Serhiy Lysak.
“Ndërsa vendet e tjera të botës po festojnë Krishtlindjet, ukrainasit po vazhdojnë të vuajnë nga sulmet e pafundme ruse”, shkroi në Telegram Avokati i Popullit në Ukrainë, Dmytro Lubinets.
Guvernatori Lysak postoi fotografi të shpëtimtarëve që kalojnë nëpër një grumbull të madh rrënojash, duke gjetur një person të mbuluar me pluhur dhe duke e ngarkuar në një ambulancë.
“Mund të ketë ende njerëz nën rrënoja,” shkroi ai pak para orës 18:00 me orën lokale, më shumë se dy orë pas sulmit.
Kryvyi Rih, vendlindja e presidentit të Ukrainës, Volodymyr Zelenskiy, është një qytet prodhues çeliku me një popullsi prej më shumë se 600,000 banorësh.
Rrethinat e saj jugore shtrihen rreth 65 kilometra nga territori më i afërt i pushtuar nga Rusia dhe ka qenë rregullisht objektiv i sulmeve me raketa ruse gjatë gjithë luftës./kk
