Në Agjencinë e Sigurisë dhe Informacionit të Serbisë (BIA) nën udhëheqjen e Aleksandar Vulin, në fund të verës u formua Drejtoria e Nëntë e Arrestimeve, e cila të kujton shumë kohën e Sllobodan Millosheviqit, kur ishte aktive njësia famëkeqe e Operacioneve Speciale (JSO), liderët dhe anëtarët e të cilës morën pjesë në vrasjen e kryeministrit serb, Zoran Gjingjiq dhe tentuan vrasjen e kreut të SPO-së, Vuk Drashkoviq në autostradën e Ibrit.
Ajo që është edhe më shqetësuese është informacioni se në njësinë e sapoformuar të Vulinit ka ish-pjesëtarë të asaj JSO famëkeqe.
Danica Drashkoviq pohon se pikërisht kështu është. Ajo thotë se Drejtoria e Nëntë e sapoformuar është themeluar nga ish-pjesëtarët e JSO-së, të cilët pas shpërbërjes së asaj njësie janë caktuar në SAJ (Njësia Speciale Antiterroriste).
Ajo vlerëson se BIA nuk ka formuar Drejtorinë e Nëntë, por Njësinë e re të Operacioneve Speciale (JSO).
“Është formuar nga ish-anëtarë që janë caktuar në SAJ pas shpërbërjes së asaj njësie. Ata që nuk morën poste në Qeveri apo Telekom, si Dejan Careviq, tash gardian i të gjitha burgjeve në Serbi, apo Milan Nikoliq, një nga drejtorët e Telenorit, Millan Ateljeviq më pas u caktua në kabinetin e kryeministrit, ndërsa Branislav Duniq është në Ministrinë e Punëve të Jashtme. Pjesa tjetër e njësisë shkoi në Njësinë Speciale Antiterroriste”, thotë Drashkoviq.
Bashkëbiseduesi i Nova-s thotë se nga SAJ janë transferuar në Drejtorinë e Nëntë njëmbëdhjetë anëtarë dhe një nga Xhandarmëria.
“Ata u caktuan në një njësi të re për operacione speciale në BIA, me urdhër të Vulinit, i cili dëshiron të përsërisë terrorizmin shtetëror të Sllobës, të vrasë në Serbi, Kosovë dhe kudo që duhet. Do të ketë aksidente trafiku, “Panda” dhe krime politike si dikur”, thotë Danica Drashkoviq, shkruan Ballkani.info.
Ajo po ashtu thotë se komandant i njësisë do të jetë Predrag Maçeshiq, i cili është në JSO që nga viti 2002.
“Ai është përkrahës i madh i Legias. Ai nuk u ndoq penalisht, ndonëse u akuzua për dëshmi të rreme në gjyqin për vrasjen e kryeministrit Zoran Gjinxhiq, në favor të Legias, si dhe ai kishte frikësuar edhe nënën dhe motrën e Gjinxhiqit gjatë gjykimit. Përveç tij, në Drejtorinë e Nëntë të sapoformuar do të jenë edhe heronjtë e shquar të kohëve të këqija, Darko Radisavljeviq, Millisav Mërkiq, Goran Mizdrag e të tjerë”, thekson ajo.
JSO qëndron pas vrasjes së vëllait të Danica Drashkoviq dhe tentimvrasjes së kreut të SPO-së, Vuk Drashkoviq.
Më 3 tetor 1999, në autostradën e Ibrit, me urdhër të Sllobodan Millosheviqit, u tentua të vritet Vuk Drashkoviq, lideri i SPO-së. Me atë rast u vranë katër bashkëpunëtorë të tij. U vranë Veselin Boshkoviq, vëllai i Danica Drashkoviqit dhe pjesëtarët e sigurimit personal të Drashkoviqit, Zvonko Osmajliq, Dragan Vushureviq dhe Vuçko Rakoçeviq.
Ish-shefi i DB-së, Rade Markoviq, ish-komandanti i JSO-së Milorad Ulemek Legia, ish-shefi i policisë së Beogradit Branko Gjuriq, ish-kreu i Qendrës së DB-së të Beogradit Milan Radonjiq dhe pesë anëtarë të tjerë të JSO-së akuzohen për krimin në Magjistralën e Ibrit.
Në atë kolonë ka qenë edhe Danica Drashkoviq, e cila ka shmangur një përplasje.
Më 3 tetor 1999, pesë anëtarë të JSO-së u dënuan për pjesëmarrje të drejtpërdrejtë në atentatin në fshatin Petka, në autostradën e Ibrit, të cilët sipas aktgjykimeve kanë marrë pjesë edhe në vrasje të tjera politike. Është konstatuar se kamioni i ngarkesave, i cili ka inskenuar aksidentin, drejtohej nga Nenad Iliq Glavonja, i cili pas aksidentit u largua nga vendi i aksidentit.
Mihalj Kertes, drejtori i Drejtorisë doganore dhe njeri i besuar i Millosheviqit, u dënua me një vit e gjysmë burg, sepse ndihmoi DB-në të mbulonte krimin duke i dhënë një kamion të ri dhe për atë që shkaktoi përplasje, ka krijuar dokumente të falsifikuara. Shefi i policisë rrugore serbe Dragisha Diniq dhe shefi i policisë rrugore të Beogradit Vidan Mijailoviq u dënuan me 10 dhe gjashtë muaj burg.
Gjykatat në Serbi në tre instanca, në një aktgjykim që tani është ligjërisht i detyrueshëm, deklaruan se presidenti i atëhershëm i Serbisë, Sllobodan Millosheviq, kërkoi likuidimin e kundërshtarëve politikë për “motive të liga”.
