Mysafirët e bardhë janë ulur në katin përdhes, ndërsa ata jo të bardhë në katin e sipërm, ka treguar një video e një klienti, duke shkaktuar po ashtu reagimin e një deputetit francez.
Një restorant në Paris është akuzuar se ka ndarë mysafirët jo të bardhë nga ata të bardhë, raportojnë mediat lokale, transmeton Kosova Post.
Restoranti CoCo ka ulur një klient të ri me origjinë aziatike në një tavolinë në katin e sipërm, siç tregohet nga një video që klienti filmoi në fillim të këtij muaji dhe e postoi në TikTok.
Kur i riu u ul, ai vuri re se të gjithë klientët jo të bardhë të restorantit, duke përfshirë klientët e zi dhe ata me origjinë nga Afrika e Veriut dhe Azia, po hanin pikërisht aty.
Më pas ai filmoi katin e parë për të konfirmuar vëzhgimet e tij.
“Shikojeni këtë, vetëm të bardhë, të bardhë të bardhë, të gjithë të bardhë”, tha ai, duke krahasuar katin përdhes me atë ku ishte ulur.
David Guiraud, deputet i parlamentit, u ka drejtuar një deklaratë pronarëve të restorantit duke kërkuar shpjegim.
“Këto klipe ju akuzojnë për ndarjen e mysafirëve bazuar në ngjyrën e lëkurës së tyre: kryesisht njerëzit që konsiderohen të bardhë hanë në katin e parë, ndërsa njerëzit që konsiderohen të zinj, arabë ose aziatikë ulen kryesisht në katin e sipërm”, ka thënë Guiraud.
Deputeti ka shtuar se ka lajmëruar prokurorinë e Parisit, duke thënë se nëse vërtetohet, një diskriminim i tillë mund të çojë në një dënim me pesë vjet burg dhe gjobë prej 75 mijë eurosh.
