Agjencia e OKB-së për Ndihmë dhe Punë për Refugjatët Palestinezë (UNRWA) tha se civilët që vuajnë nga uria në Rripin e Gazës janë përballur me sulme të rënda izraelite ndërsa kërkonin ushqim në qendrat e shpërndarjes së ndihmave, transmeton Anadolu.
UNRWA-ja citoi në një deklaratë dëshminë e një të mbijetuari palestinez të një sulmi në një qendër shpërndarjeje në Rafah, e cila ishte themeluar nga Fondacioni Humanitar i Gazës (GHF) i mbështetur nga SHBA-ja dhe Izraeli nën maskën e ndihmës humanitare.
Deklarata vuri në dukje se palestinezët e uritur, në kërkimin e tyre të dëshpëruar për ushqim, po ekspozohen ndaj sulmeve intensive izraelite në të ashtuquajturat qendra shpërndarjeje, duke vënë jetën e tyre në rrezik të madh.
Ajo tha se shumë kthehen në shtëpi duarbosh pasi u mbijetojnë sulmeve.
Deklarata nënvizoi nevojën urgjente për të rifilluar shpërndarjen e sigurt të ndihmës për banorët e Gazës dhe theksoi se kjo duhet të kryhet përmes agjencive të OKB-së, përfshirë UNRWA-në.
Që nga 27 maji, ushtria izraelite ka kryer sulme në zonat e shpërndarjes të krijuara nën maskën e ndihmës humanitare nga GHF-ja, e mbështetur nga Izraeli dhe SHBA-ja.
Forcat izraelite kanë hapur zjarr ndaj civilëve që mblidhen në vendet e shpërndarjes në “zonat tampon” të krijuara nga Izraeli.
Sipas të dhënave nga Zyra e Medias në Gaza, midis 27 majit dhe 6 qershorit, forcat izraelite kryen sulme ndaj palestinezëve në qendrat e shpërndarjes, duke vrarë 110 viktima dhe duke plagosur 583 të tjerë.
Trupat e nëntë palestinezëve mbeten të zhdukur.
