Omleta është një ndër ushqimet më të shijshme që ju shoqëron çdo mëngjes dhe ka me dhjetra mënyra gatimi.
Për të përgatitur një omletë ju mund të përdorni një shumëllojshmëri përbërësish që mjafton t’i përziesh me vezën dhe t’i skuqësh.
Sigurisht kjo është mënyra tradicionale e përgatitjes së saj, por sot AgroWeb.org ju sjell një metodë të re të shijimit të kësaj recete që preferohet nga të gjitha grupmoshat.
Receta e mëposhtme ka shumë përbërës që nuk mungojnë asnjëherë në frigoriferin e një amvise shqiptare.
Bëhet fjalë për: vezët, qumështin, suxhukun, djathin dhe majdanozin.
Përpara gatimit, ekspertët e AgroWeb.org argumentojnë se omleta e furrës ka avantazhin se nuk përmban shumë yndyrë.
Në rastin e recetës së mëposhtme ju mund të përdorni pak vaj ulliri për të lyer tavën.
Vaji i ullirit është një nga yndyrnat më të shëndetshme jo vetëm për pjekjen por edhe për skuqjen e vezëve.
Kështu omleta përveçse bëhet një nga ushqimet tuaja të preferuara por edhe një alternativë shumë të shëndetshme.
Përbërësit:
10 vezë
2 gota qumësht
1 filxhan çaji djathë të bardhë ose djathë parmixhan
1 filxhan çaji me copa suxhuku
Çerek filxhan çaji me majdanoz të freskët e të grirë
1 lugë çaji kripë
Piper të zi
Përgatitja:
Ndizeni furrën në 200°C
Tavën e omletës lyejeni lehtë me pak vaj ulliri
Rrihini vezët në një enë të madhe dhe shtoni qumështin.
Pasi t’i keni përzier mirë, shtoni djathin, sallamin dhe majdanozin.
Ndërkohë që i përzieni së bashku, shtoni kripën dhe piperin.
Masën e omletës hidheni në tavë.
Omleta duhet pjekur për 45 minuta ose deri sa sipërfaqja e saj të ketë marrë ngjyrë të artë.
Pasi ta hiqni nga furra, prisni të paktën 5 minuta përpara prerjes në copa.
Omleta e furrës serviret e ngrohtë.
Nëse nuk keni kohë ta gatuani, tavën me omletën e pagatuar mund ta fusni në frigorifer, ta mbani për 24 orë dhe ta gatuani të nesërmen.
