Pavarësisht shumë thirrjeve të Bashkimit Evropian dhe të Shteteve të Bashkuara të Amerikës që Serbia të ndërrojë qasje politike karshi Rusisë, përkundrazi po i forcon marrëdhëniet me Rusinë. Këtë e ka argumentuar edhe vizita e sotme e Ivica Daçiqit si ministër i Punëve të Jashtme të Serbisë në Moskë, ku u prit nga homologut i tij rusë, Sergej Lavrov. Temë e këtij takimi ishte edhe Kosova.
Marrëdhëniet mes Rusisë dhe Serbisë janë në nivel të lartë dhe po përmirësohen. Kjo u bë e ditur ne takimin e zëvendëskryeministrit të Serbisë dhe ministrit të Punëve të Jashtme të Serbisë, Ivica Daçiq, me ministrin e Jashtëm rus Sergej Lavrov në Moskë.
Ata të dy po ndjekin edhe ndeshjen miqësore të futbollit të Rusisë dhe Serbisë, e cila është shteti i parë evropian që luan në Rusi pas fillimit të agresionit ndaj Ukrainës. Kjo qasje e qeverisë aktuale ndaj Moskës, për opozitën do të thotë largim nga integrimi evropian.
“Sllobodan Millosheviqi dhe Vojislav Sheshel janë baballarët politikë të Aleksandër Vuçiqit dhe Ivica Daçiqit, kështu që kur e shihni Daçiqin duke shkuar me gëzim te Lavrov, si i vetmi ministër evropian, ose kur Vuçiq përqafon rregullisht Harçenkon, kuptojmë se Serbia po shtyhet gjithnjë e më shumë në humnerë të izolimit”, ka theksuar Borko Stefanoviq nga Partia për Liri dhe Drejtësi.
Opozita pro-evropiane vlerëson se ngrohtësia politike e Vuçiqit me Putinin bazohet në bashkëpunimin e dy njerëzve me qëndrimin e njëjtë ndaj opozitës, zgjedhjet jo të lira, presionin ndaj medieve dhe ndaj oponentëve. Gjithashtu, sipas ekspertëve, kur bëhet fjalë për Kosovën, Serbia po mbështetet në Rusi, duke u distancuar kështu nga Perëndimi.
“Tani kemi një situatë ku politika serbe po shkon drejt Rusisë, ndërsa problemet tona janë te lidhura me Perëndimin. Kjo është një enigmë e pazgjidhshme dhe nuk mund të na sjellë asnjë dobi në aspektin e zgjidhjes së çështjes së Kosovës, sepse Rusia praktikisht e përjashtoi veten prej asaj çështje. Pra, situata në kuptimin ndërkombëtar po përkeqësohet, veçanërisht në marrëdhëniet me BE-në dhe SHBA-në”, ka thënë ish-ambasadori, Sreqko Gjukiq.
Një pjesë e publikut thekson se Vuçiq, si i vetmi president evropian që e uroi Putinin për fitoren e zgjedhjeve, i shkaktoi dëm Serbisë./rtk
