Deklarata e deputetit të PDK-së, Xhavit Haliti, se Ibrahim Rugova i kishte kërkuar presidentit amerikan, Bill Clinton, që të mos e njohë Ushtrinë Çlirimtare të Kosovës, ka nxitur një varg reagimesh. Ka qenë kryetari i LDK-së, Lumir Abdixhiku, i cili nga studio e Pressing të T7 i ishte kundërpërgjigjur Halitit.
Abdixhiku kishte thënë se Haliti është një kundërshtar ideologjik i Ibrahim Rugovës, dhe se bashkë me Baton Haxhiun kanë averzion ndaj projektit të Ibrahim Rugovës, që sipas Abdixhikut është projekt fitimtar.
“Si deklaratë është skandaloze, dhe si dëshmi historike është e pa relevancë, por si mjet analitik është shumë e rëndësishme. Sepse bëhet fjalë për kundërshtarët ideologjik të Ibrahim Rugovës që kanë një averzion ndaj projektit të tij dhe faktit që projekti i tij është fitimtar, pra projekti i Ibrahim Rugovës, i një Kosove të pavarur, sovrane, të anëtarësuar në NATO dhe BE”, kishte thënë Abdixhiku si kundërpërgjigje ndaj Halitit e Haxhiut.
Pa reaguar s’ka qëndruar Xhavit Haliti, i cili të shtunën e kaluar, i kishte thënë Abdixhikut se po tenton të bëhet rugovian, pa e njohur as doktrinën e as vetë Rugovën.
“Lumiri që e ka postin falas, kërkon të bëhet rugovian, pa njohur siç duhet as doktrinën dhe as vetë Rugovën!”, ka shkruar ai më 23 mars.
Tutje Haliti kishte thënë se Abdixhiku do të ketë kohë të mësojë shumë gjerë.
“Nejse, ka kohë të mësojë shumë gjëra, përfshirë edhe atë se historia as nuk pritet me gërshërë dhe as nuk mbulohet me “make up”!”, kishte shtuar Haliti.
Pas kësaj përplasje me Abdixhikun për Ibrahim Rugovën, Xhavit Haliti ka publikuar në profilin e tij në ‘facebook’, një fotografi me djalin e ish-presidentit të Kosovës, Ukë Rugovën., shkruan gazeta express.“N’miqësi të përhershme!”, ka shkruar Haliti në postimin e bërë sot.
