Partia Demokratike e Kosovës ka reaguar ashpër ndaj qëndrimeve të fundit të Prokurorisë së Gjykatës Speciale në Hagë, duke vlerësuar se ato përbëjnë devijim serioz nga misioni themelor për sjelljen e drejtësisë dhe janë në shërbim të narrativës së rreme serbe.
Sipas PDK-së, në ditën e parë të fazës përmbyllëse të gjykimit u dëshmua qartë se procesi ka tejkaluar kornizat e një gjykimi të zakonshëm dhe po shndërrohet në përpjekje për deformim të së vërtetës historike, duke e paraqitur luftën çlirimtare të popullit të Kosovës si projekt kriminal.
Partia thekson se krimet e rënda të kryera nga regjimi i Sllobodan Millosheviqit dhe aparati shtetëror i Serbisë në Kosovë dhe rajon, përfshirë krime kundër njerëzimit, spastrime etnike dhe gjenocid, janë të dokumentuara gjerësisht nga mekanizma ndërkombëtarë të drejtësisë dhe nga faktet historike.
“Pra, është fakt i ditur që Serbia ishte agresore dhe populli i Kosovës ishte viktimë”, thuhet në reagim.
PDK nënvizon se Ushtria Çlirimtare e Kosovës ishte një organizim popullor, i lindur nga nevoja për rezistencë ndaj një regjimi shtypës dhe gjenocidal, dhe se ajo përfaqësonte përgjigjen e domosdoshme përballë dhunës shtetërore dhe mohimit të çdo rruge tjetër për liri.
“Hashim Thaçi, Kadri Veseli, Jakup Krasniqi dhe Rexhep Selimi nuk po gjykohen si individë të shkëputur nga konteksti historik, por si simbole të rezistencës, të çlirimit dhe të shtetformimit të Kosovës. Kjo qasje e Prokurorisë synon barazimin e viktimës me agresorin dhe kriminalizimin e luftës për liri. Ajo u konkretizua edhe sot përmes kërkesës për dënime absurde që reflektojnë vetëm ndëshkim politik dhe selektiv”, thuhet në reagim.
Po ashtu, PDK e konsideron të papranueshme përpjekjen për ta ndërlidhur shpalljen e pavarësisë së Kosovës me pretendime kriminale, duke theksuar se pavarësia është akt politik i njohur ndërkombëtarisht dhe i mbështetur në të drejtën universale të popujve për vetëvendosje.
Partia Demokratike e Kosovës rikonfirmon bindjen e saj të plotë në pafajësinë e çlirimtarëve dhe në legjitimitetin e luftës së Ushtrisë Çlirimtare të Kosovës, duke theksuar se çdo përpjekje për kriminalizimin e kësaj lufte përbën rishkrim të historisë dhe cenim të themeleve të shtetit të Kosovës.
“Liria nuk është krim dhe historia nuk mund të rishkruhet”, përfundon reagimi i PDK-së.
