Pentagoni ka hedhur poshtë raportet sipas të cilave sekretari amerikan i Mbrojtjes, Pete Hegseth ndau plane të ndjeshme ushtarake në lidhje me një sulm të marsit ndaj milicisë Houthi, të mbështetur nga Irani në Jemen, në një grup mesazhesh që përfshinte bashkëshorten e tij.
”New York Times” dhe transmetuesi CNN raportuan dje se Hegseth ndau detajet përmes aplikacionit të koduar të mesazheve Signal.
”Grupi u krijua gjatë seancës dëgjimore të konfirmimit të Hegseth si një mënyrë për aleatët e tij për të ndërtuar strategjitë”, raportoi CNN.
Përveç bashkëshortes, për të cilën thuhet se nuk ka një rol në Departamentin e Mbrojtjes, grupi përfshinte vëllain dhe avokatin e tij, të cilët të dy kanë punë me Pentagonin.
”New York Times” raportoi se Hegseth përdori telefonin e tij personal, në vend të një pajisjeje qeveritare, për të hyrë në bisedë në Signal.
Zëdhënësi i Pentagonit, Sean Parnell hodhi poshtë raportimet e mediave, duke deklaruar se ato bazoheshin në “ankesat e ish-punonjësve të pakënaqur”.
“Mediat që urrejnë Trumpin vazhdojnë të jenë të fiksuara me shkatërrimin e kujtdo që është i angazhuar në axhendën e presidentit Trump”, tha ai në një deklaratë.
“Nuk ka asnjë informacion të klasifikuar në asnjë bisedë në Signal… Ajo që është e vërtetë është se Zyra e Sekretarit të Mbrojtjes po vazhdon të bëhet më e fortë dhe më efikase në zbatimin e agjendës së presidentit Trump”, theksoi ai.
Demokrati kryesor i opozitës, Chuck Schumer shkroi në X se Hegseth kishte vënë jetë në rrezik, shkruan atsh.“Pete Hegseth duhet të shkarkohet”, tha ai./ a.jor.
