Ministri izraelit i Mbrojtjes, Yoav Gallant, ka shprehur hapur zhgënjimin për dështimin e qeverisë për të pasur një plan të pasluftës për Gazën.
Në një shenjë të rrallë përçarjeje mbi drejtimin e fushatës ushtarake brenda kabinetit të luftës së Izraelit, Gallant i kërkoi kryeministrit Benjamin Netanyahu të deklarojë publikisht se Izraeli nuk ka një plan për të marrë përsipër sundimin civil dhe ushtarak në Gaza.
“Që nga tetori, unë e kam ngritur këtë çështje vazhdimisht në kabinet dhe nuk kam marrë asnjë përgjigje”, tha ai.
Kryeministri Benjamin Netanyahu u përgjigj ashpër, duke thënë se ai “nuk ishte gati të shkëmbente Hamastanin me Fatahstan”, duke iu referuar grupeve rivale palestineze Hamas dhe Fatah.
Pavendosmëria, paralajmëroi ai, do të linte vetëm dy opsione të këqija në Gaza: sundimin e Hamasit ose sundimin ushtarak izraelit.
Një tjetër anëtar i kabinetit të luftës, Benny Gantz, i cili nuk është pajtuar me Netanyahun në të kaluarën, u pajtua me ministrin e Mbrojtjes: “Gallant flet të vërtetën. Është përgjegjësi e lidershipit të bëjë gjënë e duhur për vendin me çdo kusht.”
Gallant tha se struktura e mbrojtjes, të cilën ai drejton, kishte paraqitur një plan lufte në kabinet, që në natën kur filloi pushtimi tokësor i Izraelit në Gaza, tetorin e kaluar, shkruan A2CNN. Ai tha se planet përfshinin propozime për të krijuar një alternativë lokale qeverisëse palestineze joarmiqësore.
