Në Gjykatën Themelore në Ferizaj përfundoi seanca dëgjimore ndaj gjashtë të dyshuarve për vrasjen e policit Muhamed Lika, raporton Ekonomia Online nga kjo gjykatë.
Haki Bela, Edmond Lika, Shkëlqim Kuka, Rilind Murati, Diamant Gashi dhe Vatan Çaka, u paraqitën para gjykatës.
Prokuroria Themelore në Ferizaj ka kërkuar caktimin e masës së paraburgimin ndaj gjashtë të dyshuarve.
Gjykata Themelore pritet të merr vendim së shpejti.
Avokati Musa Konxheli tha se të tre të dyshuar për vrasjen e policit Muhamed Lika janë deklaruar të pafajshëm, raporton KosovaNews.
“Nuk ka asnjë grup e as organizim”, tha Kongjeli, ndërsa bëri të ditur se kanë kërkuar masën e arrestit shtëpiak për të dyshuarit. Sipas tij, kjo masë është e mjaftueshme.
Avokati Musa Kongjeli në një deklarim për media ka mohuar çdo përfshirje klientit të tij, Rilindit Murati, në vrasjen e policit.
Ai hodhi poshtë edhe pretendimet për ekzistencën e një grupi të organizuar që qëndron pas kësaj ngjarjeje.
Mbrojtja ka kërkuar masë më të butë sigurie për klientin, duke propozuar arrestin shtëpiak në vend të paraburgimit.
“Unë, si mbrojtës i Rilind Muratit, duke u bazuar në ato prova që deri tash i kemi, konsiderojmë që klienti im nuk është i përfshirë fare në këtë vepër. Klienti im kategorikisht e refuzon që në çfarëdo forme të jetë i përfshirë në këtë vepër penale. Ne po konsiderojmë se nuk ka pasur fare grup për organizimin e kësaj vrasjeje. Të gjithë janë deklaruar të pafajshëm. Ne kërkuam masën e arrestit shtëpiak”, tha ai.
Ç’thuhet në dosjen e Prokurorisë për vrasjen e policit Muhamed Lika?
“Ekziston dyshimi i bazuar se me datë 01.04.2025, rreth orës 23:00, në Kaçanik, në rrugën “Idriz Seferi”, përkatësisht në katin e II-të të hyrjes së ndërtesës, të pandehurit duke vepruar në bashkëkryerje, me dashje dhe përgatitje paraprake kanë planifikuar për ta privuar nga jeta tani të ndjerin zyrtarin e policisë, rreshterin M.L., me detyrë në Stacionin Policor në Kaçanik, ku viktima pas përfundimit të orarit të punës ora 22:53, rrugës për në banesën e tij, i njëjti ishte përcjell në vazhdimësi nga madhorët deri te hyrja e banesës së tij ku pasi që hynë në objektin e banesës ku ka jetuar duke u ngjitur shkallëve, i mituri i shkon nga mbrapa dhe pasi që viktima hynë në objektin banesor, i mituri me të takuar të ndjerin ka shtënë në drejtim të tij me armë zjarri dhe në vend ngjarje janë gjetur katër gëzhoja të kalibrit 9.19 mm dhe nga plagët e marra nga predhat e armës së zjarrit, viktima M.L., ka ndërruar jetë, me këtë në bashkëkryerje, të pandehurit do të kryenin veprën penale “Vrasje e rëndë”nga neni 173 paragrafi 1 nën paragrafi 1.9 lidhur me nenin 31 të Kodit Penal të Republikës së Kosovës Nr. 06/L-074”.
