Derisa kryefjala e zhvillimeve në vend së fundmi ka qenë buxheti i 2025-së, i pari i Financave, Hekuran Murati, ka ngritur një sërë akuzash ndaj ish-qeverisjeve të kaluara, po për buxhet.
Murati përmes një postimi në rrjetin e tij social Facebook ka thënë se të paktën 1.4 miliardë euro i janë vjedhur buxhetit duke mos inkasuar taksat për mallin që është futur në Kosovë si kontrabandë.
E me këtë rast, ai ka publikuar edhe një grafikon të importit të deklaruar që ka hyrë në Kosovë, teksa ka akuzuar ish-qeverisjet për mosluftim të kontrabandës. “Nëse ky mall nuk do të lejohej si kontrabandë, por do të deklarohej i tëri siç bëhet tani, vetëm TVSH-ja e mbledhur do të arrinte në 1.4 miliardë euro. E mos të flasim për tarifat doganore dhe akcizën, që me shumë gjasë një pjesë e madhe e këtij malli mund të ketë qenë mall akcizor. Kjo njëkohësisht e demanton edhe pretendimin e opozitës që shpesh e dëgjojmë, se gjoja në Qeverinë Kurti është rritur importi. Grafikoni i paraqitur më poshtë e vërteton që në fakt importi nuk ka qenë i ulët as në të kaluarën, por kontrabanda ka qenë e lartë, dhe prandaj regjistrimi zyrtar e qet që ka pasur më pak import për ato vite.
Mirëpo, i shpejt ishte reagimi i ish-ministres së Financave, deputetes së LDK-së, Hykmete Bajrami. Ajo tha se po manipulohet me shifra, teksa akuzoi ministrin Murati se inflacionin po e paraqetë si luftë kundër kontrabandës.
“Hekuran, në vitin 2015 nuk ka pasë inflacion ka pasë deflacion për -0.54%, ndërsa inflacioni (rritja mesatare e çmimeve) në vitin 2022 ka qënë 11.6%. Në fund përballë supozimeve dhe manipulimeve të Hekuranit ka një të vërtetë, ajo e vërtetë burimin e ka në Agjencinë e Statistikave të Kosovës: më vlera absolute kur Hekurani ka shku në zyre deficit tregtar ka qënë 2.8 miliardë Euro, sot deficit tregtar është mbi 5 miliardë euro (deficit tregtar është dallimi mes mallrave që shesim jashtë vendit dhe atyre që blejmë jashtë vendit)”, ka shkruar ajo.
Ditë më parë ministri Murati i reagoi opozitës edhe sa i përket rritjes së pagave, teksa tha se në 2017-tën pagat për kabinetin qeveritar ishin rritur për 100 %, ndërsa një vit më pas për shërbyesit publikë ishin rritur për 4%./rtk
