Papa Leone XIV dhe udhëheqja e Kishës Katolike në SHBA janë përfshirë në një përplasje të hapur me administratën e Presidentit Donald Trump për politikën e deportimeve masive të emigrantëve.
Kritikat e Papës, i lindur në Shtetet e Bashkuara, kanë zemëruar një pjesë të katolikëve konservatorë dhe zyrtarë të qeverisë, të cilët e akuzojnë Kishën se po ndërhyn në politikë.
Jesse Romero, podkaster katolik konservator dhe mbështetës i Trump, thotë se Papa duhet të përqendrohet vetëm në çështjet shpirtërore. “Papa duhet të na tregojë si të shkojmë në parajsë. Ai nuk ka autoritet mbi qeverinë dhe duhet të qëndrojë në rrugën e tij,” shprehet Romero, duke kritikuar hapur Papën dhe peshkopët amerikanë për kundërshtimin e deportimeve.
Përplasja u thellua pasi Papa Leone XIV shprehu publikisht shqetësimin për trajtimin e emigrantëve në SHBA, duke bërë thirrje për “reflektim të thellë” dhe duke cituar Ungjillin: “Në fund do të na pyesin: si e pritët të huajin?”. Një javë më vonë, Konferenca e Ipeshkvijve Katolikë të SHBA-së (USCCB) publikoi një “Mesazh të Veçantë”, ku shprehte shqetësim për “klimën e frikës dhe ankthit” dhe kundërshtonte “deportimet masive pa dallim”.
Deklarata u mbështet nga Papa, i cili e cilësoi atë “shumë të rëndësishme” dhe u bëri thirrje katolikëve ta dëgjonin me kujdes. Ishte hera e parë pas më shumë se një dekade që peshkopët amerikanë ndërhynin në këtë formë.
Reagimi nga administrata Trump ishte i ashpër. Cari kufitar i Shtëpisë së Bardhë, Tom Homan, deklaroi se Kisha “gabohet” dhe duhet të përqendrohet në problemet e saj të brendshme. Ndërsa zëdhënësja e Shtëpisë së Bardhë, Karoline Leavitt, hodhi poshtë deklaratën e Papës se trajtimi i emigrantëve ishte “çnjerëzor”.
Sipas analistëve, përplasja është edhe politike. David Gibson, drejtor i Qendrës për Fe dhe Kulturë në Universitetin Fordham, thotë se qeveria llogarit se mbështetja e katolikëve konservatorë, sidomos atyre të bardhë, është mjaftueshëm e fortë për të përballuar një konflikt me Vatikanin. Studimet tregojnë se rreth 60% e katolikëve të bardhë mbështesin qasjen e Trump ndaj emigracionit, ndërsa vetëm 30% e katolikëve hispanikë ndajnë të njëjtin qëndrim.
Në terren, pasojat ndihen fort. Në Çikago dhe shtete të tjera, klerikë dhe famullitarë raportojnë se janë penguar të ofrojnë shërbesa fetare për emigrantët e ndaluar nga ICE. Organizata fetare kanë ngritur padi federale, duke pretenduar se u është bllokuar ushtrimi i lirë i besimit.
Peshkopi Joseph Tyson i shtetit të Uashingtonit, një nga mbështetësit e deklaratës së peshkopëve, thotë se politikat aktuale nuk janë të drejtuara vetëm ndaj kriminelëve. “Dëbimet që po shohim nuk janë të synuara. Ato po prekin familje të tëra dhe janë në kundërshtim me Ungjillin,” thekson ai.
Nga ana tjetër, zëra si Jesse Romero argumentojnë se Kisha po largohet nga doktrina, duke theksuar se emigrantët duhet t’u binden ligjeve të shtetit pritës. “Papa dhe peshkopët janë njerëz, jo të pagabueshëm,” thotë ai.
Përplasja mes Papës Leone XIV dhe qeverisë amerikane ka nxjerrë në pah ndarjet e thella brenda Kishës Katolike në SHBA, duke e kthyer emigracionin jo vetëm në një çështje politike, por edhe në një betejë morale dhe fetare.
