Policia e Kosovës, në bashkëpunim me Doganën e Kosovës, ka ndaluar një automjet të dyshuar për transport të mallrave të kontrabanduara në zonën e Mitrovicës së Veriut.
“Me datën 06.04.2026 rreth orës 19:15 në zonën e fshatit Banjskë dhe Sharani-Kamen, në rrugë malore, njësitë policore dhe njësitë e Doganës së Kosovës, gjatë një aksioni të përbashkët për luftimin e kontrabandës, kanë vërejtur një automjet pa targa i cili lëvizte me shpejtësi të madhe”, thuhet në njoftim.
Sipas autoriteteve, njësitë policore kanë ndjekur automjetin e dyshimtë, por personat që ndodheshin në të e kanë braktisur atë dhe janë larguar në drejtim të panjohur.
“Gjatë kontrollit është vërtetuar se në veturë kishte mall të kontrabanduar: 32 thasë me pantallona (1217 palë xhinse) dhe një thes me rripa pantallonash (303 copë rripa)”, bëhet e ditur më tej.
Po ashtu, në automjet janë gjetur edhe targa të shtetit të Serbisë, një kanistër plastik me naftë dhe një radiolidhje.
“Nga njësitë e Doganës së Kosovës është bërë konfiskimi i mallit të kontrabanduar”, thuhet në njoftim, duke shtuar se me udhëzimet e Prokurorit të shtetit, rasti do të trajtohet nga Dogana e Kosovës.
