Profesori universitar dhe politologu Dorajet Imeri ka komentuar zhvillimet e fundit lidhur me përplasjet mes Shteteve të Bashkuara të Amerikës dhe Venezuelës, duke i vendosur ato në një kontekst më të gjerë gjeopolitik.
Sipas Imerit, tensionet SHBA–Venezuela nuk duhen parë si të izoluara, por si pjesë e një strategjie globale ku Uashingtoni po përballet gjithnjë e më drejtpërdrejt me ndikimin rus, kinez dhe iranian në rajone të ndryshme të botës.
Ai thekson se në Ballkan, Serbia vazhdon të mbështetet në të njëjtin bosht aleancash si Venezuela, duke përfshirë Rusinë, Kinën dhe Iranin. Sipas tij, lidershipi në Beograd po llogarit se mund të vazhdojë lojën mes të ashtuquajturit “neutralitet” dhe orientimit lindor pa pasoja serioze. Megjithatë, ky kalkulim, sipas Imerit, po përballet me rezistencë gjithnjë e më të fortë nga SHBA dhe NATO.
“Mungesa e një pozicionimi të qartë pro-perëndimor mund t’i kushtojë shtrenjtë Serbisë,” vëren ai.
Imeri nënvizon se Uashingtoni po dërgon sinjale të qarta se nuk do të tolerojë më përpjekjet e Moskës dhe Pekinit për të minuar interesat e SHBA-së dhe NATO-s, përmes përdorimit të aktorëve të tretë për nxitjen e tensioneve dhe konflikteve në rajone të ndryshme. Sipas tij, synimi i kësaj strategjie është dobësimi i demokracive dhe i vlerave perëndimore.
Në këtë kontekst, politologu thekson se provokimet e vazhdueshme të Serbisë në rajon po perceptohen si pjesë e një skeme më të gjerë gjeopolitike. Nëse kjo qasje vazhdon, paralajmëron Imeri, reagimi i Perëndimit mund të jetë i ashpër.
“Durimi i administratës amerikane po soset ndaj shteteve që paraqiten si neutrale, por që në realitet veprojnë kundër rendit demokratik perëndimor,” përfundon politologu Dorajet Imeri.
