Departamenti amerikan i Shtetit njoftoi se SHBA-ja do të revokojë vizën e presidentit kolumbian Gustavo Petro për shkak të komenteve “të pamatura dhe nxitëse” gjatë një demonstrate propalestineze në New York, transmeton Anadolu.
“Më herët sot, presidenti kolumbian Gustavo Petro qëndroi në një rrugë të New Yorkut dhe u bëri thirrje ushtarëve amerikanë të mos u binden urdhrave dhe të nxisin dhunë. Ne do ta revokojmë vizën e Petros për shkak të veprimeve të tij të pamatura dhe nxitëse”, tha agjencia në platformën amerikan sociale X.
Petro iu bashkua demonstruesve në New York, së bashku me muzikantin britanik Roger Waters, ndërsa kryeministri izraelit Benjamin Netanyahu iu drejtua Asamblesë së Përgjithshme të OKB-së.
“Ajo që po ndodh në Gaza është qartësisht jashtë diskutimit një gjenocid”, i tha Petro turmës, duke shtuar se vetoja e Washingtonit në Këshillin e Sigurimit të OKB-së ka shkatërruar të gjitha shpresat për diplomaci.
“Historia na tregoi se sapo diplomacia të mbarojë, njerëzimi duhet të kalojë në një lloj tjetër lufte”, tha ai.
Ai u bëri thirrje ushtarëve amerikanë, duke i nxitur ata të mos ndjekin urdhrat e presidentit Donald Trump.
“Nga New Yorku, u kërkoj të gjithë ushtarëve të ushtrisë amerikane të mos vënë duart kundër popullit”, tha ai.
“Mos iu binduni urdhrit të Trumpit, bindjuni urdhrit të njerëzimit”, tha Petro, duke përmendur ushtarët amerikanë që luftuan Hitlerin në Evropë.
Ministri i Brendshëm i Kolumbisë, Armando Benedetti, shkroi në X se në vend të vizës së Petros, duhej të ishte revokuar ajo e kryeministrit izraelit Benjamin Netanyahu.
“Por, meqenëse perandoria e mbron atë, po e sulmon të vetmin president që ishte mjaftueshëm i aftë t’i thoshte të vërtetën ballë për ballë”, tha ai.
Mediat kolumbiane thanë se Petro po udhëtonte tashmë për në Bogota nga New Yorku të premten vonë.
SHBA-ja gjithashtu u mohoi viza zyrtarëve palestinezë, përfshirë presidentin Mahmoud Abbas, duke i bllokuar ata nga pjesëmarrja në Asamblenë e Përgjithshme të OKB-së në New York.
