Prodhimi neto i energjisë elektrike në Shqipëri ka rënë 22 për qind gjatë vitit 2022.
Instituti i Statistikave (INSTAT) raporton se gjatë vitit që lamë pas prodhimi neto vendas i energjisë elektrike llogaritet në vlerën 7,003GWh nga 8,963GWh energji të prodhuar në vitin 2021.
Të dhënat e INSTAT-it, tregojnë se ky prodhim u realizua nga hidrocentralet publike në masën 55.1 për qind, nga hidrocentralet private dhe koncensionare në masën 44.2 për qind dhe nga të tjerë prodhues (fotovoltaikë) në masën 0.7 për qind të prodhimit neto vendas të energjisë elektrike.
Importi bruto i energjisë elektrike arriti vlerën 3,044GWh nga 2,253GWh që ishte një vit më parë, duke shënuar kështu një rritje me 35.1 për qind.
Ndërsa, eksporti bruto i energjisë elektrike arriti vlerën 2,123GWh nga 2,800GWh duke shënuar një rënie me 24.2 për qind. /ATSH/
