Një grup joformal studentësh organizon sot tubimin paqësor të qytetarëve “Drejtësia për viktimat në Jabllanicë”, në orën 12:00 para Parlamentit të Bosnjës dhe Hercegovinës në Sarajevë.
“Kemi mbështetjen e të gjithë njerëzve që besojnë se është koha për të ndërmarrë veprime dhe për të ndryshuar”, thanë organizatorët e protestës për Fenën.
“Kanë kaluar 4 muaj nga aksidenti tragjik në Jabllanicë, në të cilin humbën jetën 19 bashkëqytetarë tanë. Pse ende heshtin përgjegjësit? Ky nuk është vetëm një aksident, ky është rezultat i neglizhencës dhe paaftësisë sistematike të atyre që janë të detyruar të mbrojnë jetën e qytetarëve. Mjaft pritje!”, njoftuan organizatorët.
Ata theksuan se “askush nuk u mbajt përgjegjës për ekzistencën e gurores ilegale në Donja Jabllanicë, askush nuk u mbajt përgjegjës për mungesën e një Ligji për Pyjet në HNK dhe Federatën e BeH dhe askush nuk u mbajt përgjegjës për ndërtimin dhe bllokimin e lumenjve të rrëmbyeshëm”.
Ata theksojnë gjithashtu se ende nuk ka nisur hetimi, por se po kryhen vetëm veprime para hetimore, të cilat nuk kanë afat ligjor.
Siç thonë ata, përveç mungesës së përgjigjeve për shkaqet e aksidentit, ndihma shtetërore për banorët e Jabllanicës është duke u vonuar, ndërsa komuniteti lokal është lënë vetë.
“Kjo neglizhencë ndaj jetëve njerëzore nuk duhet të kalojë pa u ndëshkuar. Kërkojmë llogari nga të gjithë ata që dështuan, nga institucionet vendore e deri tek ato shtetërore. Të mos lëmë të harrohet kjo tragjedi. Drejtësi për Jabllanicën – drejtësi për BeH!”, thanë organizatorët, duke u bërë thirrje të gjithë qytetarëve që t’u bashkohen në protestat e së hënës.
Ata shtuan se presin mbështetje të madhe nga qytetarët dhe studentët dhe se pas këtij janë duke planifikuar aksione të reja për të cilat do ta informojnë publikun përmes rrjeteve sociale.g.e.
