Pas fitores 1-0 në ndeshjen e parë gjysmëfinale të Ligës së Kampionëve në Londër, javën e kaluar, Paris Saint-Germain ka një avantazh të vogël ndaj Arsenalit përpara përballjes vendimtare në “Parc des Princes”.
Me titullin në Ligue 1 tashmë të siguruar, skuadra e Luis Enrique është ende në garë për një ‘tripletë’ historike, ndërsa përgatitet për ndeshjen e gjashtë radhazi në Evropë kundër një ekipi anglez (3 fitore, 2 humbje), katër prej të cilave janë vendosur me një gol diferencë – ashtu si edhe humbja 2-1 në fundjavë ndaj Strasbourg-ut, ku PSG la pushim disa nga titullarët.
Kjo sugjeron se na pret një tjetër duel i ngushtë, megjithatë PSG ka fituar tri nga katër ndeshjet e fundit në shtëpi në Champions (1 humbje), edhe pse disfata ndaj Atlético Madridit (2-1) dhe Liverpool-it (1-0) këtë sezon tregon se nuk janë të pathyeshëm. Megjithatë, historia është në anën e tyre: parizienët janë kualifikuar në 18 nga 19 rastet e fundit në kupat e Evropës kur kanë fituar ndeshjen e parë jashtë fushe.
Për Arsenalin, humbja me PSG ishte disfata e parë në të gjitha garat që nga fundi i shkurtit (6 fitore, 6 barazime) dhe vetëm e dyta këtë sezon në Champions (9 fitore, 2 barazime). Kjo u pasua menjëherë me një tjetër humbje 2-1 ndaj Bournemouth-it në kampionat. Tani, skuadra e Mikel Arteta-s përballet me një sfidë edhe më të madhe: asnjëherë më parë nuk ka përmbysur një ndeshje me eliminim direkt në Evropë pasi ka humbur ndeshjen e parë në shtëpi (0 kualifikime në 5 raste).
Topçinjtë janë në kërkim të fitores së parë jashtë fushe kundër PSG-së (2 barazime deri tani), por vijnë pas katër fitoreve radhazi si mysafirë në Champions – edhe pse kanë pësuar saktësisht një gol në secilën ndeshje. Pasditja e parë e fazës së grupeve është hera e fundit që Arsenal ka mbajtur portën e paprekur jashtë fushe në këtë turne, por kjo statistikë nuk është domosdoshmërisht shqetësuese: ata kanë shënuar 16 gola në ato katër fitore radhazi.
Lojtarët për t’u ndjekur: Mbrojtësi Nuno Mendes vulosi rezultatin për PSG në të dy ndeshjet e çerekfinales kundër Aston Villa-s dhe ka realizuar katër nga pesë golat e fundit me klubin në këtë kompeticion. Ndërkohë, mesfushori Declan Rice, që ka arritur shifrën e 100 ndeshjeve me Arsenalin, ka shënuar tri herë në katër ndeshjet e fundit të Champions-it, dy prej të cilave pas minutës së 55-të. Ai ishte gjithashtu autor i golit të parë kundër Bournemouth-it në fundjavë.
Statistikë interesante: Arsenali nuk ka pësuar asnjë gol në Champions League këtë sezon pas minutës së 70-të.s.n.
