Kryesia e Federatës Sindikale të Shëndetësisë së Kosovës, ka protestuar para Ministrisë së Shëndetësisë me ç’rast kanë shprehur pakënaqësinë për ndërprerjen e dialogut social me Ministrinë e Shëndetësisë, mospajtimin me propozimin e qeverisë për një rritje të vogël të koeficientit prej 0.5, si dhe mos nënshkrimin e Kontratës Kolektive.
Kryetarja e kësaj Sindikate, Tevide Imeri, tha se Qeveria Kurti, nuk dëshiron sindikata, e as dialog social.
“Na kanë sjellë në këtë situatë pas gjithë kësaj kohe, si federatë që kemi qenë të prirur t’i prijmë dialogut social, kemi dhënë një hapësirë të mjaftueshme që të reflektojnë, megjithatë kjo ministri nuk ka asnjë sinjal se dëshiron të kenë bashkëpunim me sindikatat përgjithësisht… Kjo Qeveri, nuk donë Sindikata, nuk donë dialog social me sindikatat. Thjesht, nuk po i sheh si partner për dialog social, por po i sheh si armiq. Më vjen keq shumë ta them, është fjalë e rëndë, megjithatë na kanë sjellë në këtë situatë, pas gjithë kësaj kohe, si Federatë që kemi qenë të prirur t’i prijmë dialogut social, kemi dhënë një hapësirë dhe kohë të mjaftueshme që të reflektojnë. Megjithatë, kjo Ministri, nuk ka asnjë sinjal se dëshiron të ketë bashkëpunim me Sindikatat përgjithësisht”, ka theksuar ajo.
Sipas saj, qenësorja është mbyllja e dialogut social, Kontrata Kolektive Sektoriale e cila është shkëputur njëanshëm nga ministria.
“Ju e dini që kontratat dhe marrëveshjen bëhen në mes të dy palëve, poashtu duhet të ndërpritet në mes të dy palëve, kjo nuk ndodhi. Ndodhi një shkëputje e njëanshme, një kontratë sektoriale të cilën ministria e ka obligative që ta bëjë, ta nënshkruaj, është obligim Ligjor. Nuk është çështje e vullnetit tonë ose vullnetit të politikës ose Ministrisë në rastin konkret. Megjithatë, këta nuk kanë vullnet ta nënshkruajnë Kontratën, nuk kanë vullnet të zhvillojnë dialog të shëndosh social, dëshirojnë dialog që të shkojmë dhe të dëgjojmë në vazhdimësi, thjesht lavdet e tyre të cilat paraqiten gjithashtu edhe në medie, prononcimet të cilat i thonë në takime për të cilat thonë se janë takime për dialog social. Aty fliten gjana të cilat fliten në media, të cilat fliten në takim asgjë më tepër…Konsideroj dhe po shpresoj shumë që kjo protestë të jetë e fundit nga ana e FSSHK-së”, ka thënë ajo.
Gjatë protestës ata mbanin në duar pankarta me shkrime “Ndaloni mbylljen e reparteve në spitale”, “Duam kontratë kolektive”, “Mos pengoni aktivitetin sindikal”, “Stop diskriminimit në shëndetësi” e disa të tjera.rtk.
